Двата објекти на студентскиот дом „Никола Карев“ и ученичкиот дом „Ванчо Питошески“ во Охрид се пренаменуваат за сместување и изолација на пациенти со симптоми на коронавирус, соопшти градоначалникот Константин Георгиески.
Станува збор за вкупно 68 соби во двата објекта, каде што веќе се спроведуваат активности за дезинфекција и подготовка за прием на заболени.
Во координација со Министерството за здравство, директорите на здравствените установи од градот, заедно со локалната самоуправа, треба да одредат која од болниците ќе биде целосно ставена на располагање за прием и лекување на тешки и среднотешки случаи заболени со коронавирус.
Согласно состојбата и мерките и препораките на Владата, раководството на локалната самоуправа преку Координативното тело денеска одржа неколку состаноци со раководителите на здравствените установи во градот, директорите на јавните претпријатија, претставници на матичните лекари во градот се договорени оперативни мерки со чекорите што ќе се преземаат наредниот период.
„Општина Охрид издвои 300 илјади денари за помош на лица од социјално ранливите категории кои ќе се во изолација, за основни прехранбени продукти, средства за хигиена и лекови. Заедно со Црвениот крст, формирани се мобилни тимови со задача на старите и изнемоштени лица и лицата со посебни потреби, да им излезе во пресрет за било каква помош“,
рече Георгиески.
Општинските служби од денеска работат со редуциран број вработени и тоа со странки единствено преку шалтерскиот систем на архивата, повлечени се вработените на паркиралиштата низ градот, а наплатата ќе се спроведува единствено по електронски пат.
На медицинските установи во градот ќе им биде доставена медицинска опрема како термометри, пулсоксиметри, спирометри, мобилни ЕКГ-апатати, апарати за мерење притисок, глукометри и стетоскопи, набавени преку проектот „Крос фор ол“.