Петмина актуелни функционери од редовите на ДУИ се меѓу потписниците на јавната реација за состојбите во партијата за кои како одговорен е апострофиран првиот вицепремиер Артан Груби. Станува збор за двајца пратеници, заменик-министер и двајца градоначалници.
И двајцата потпишани пратеници – Изет Меџити и Мерита Колчи Коџаџику, се од Чаир, општината од која доаѓа и вицепремиерот Груби. Антагонизмот на релација Меџити – Груби не е ништо ново и тлее неколку години, а особено се засили по изборот на Груби за прв вицепремиер.
На реакцијата може да се види и потписот на Башким Хасани, заменик-министер за одбрана, кој доаѓа од Гостивар. Пред да стане заменик-министер, бил заменик-директор во Управата за финансиска полиција, а претходно – раководител на Секторот за поддршка на градоначалникот на Општина Гостивар. Важи за човек на Невзат Бејта, кој исто така е потпишан на петицијата.
Меѓу потпишаните актуелни функционери се и градоначалниците на Чаир и на Сарај, Висар Ганиу и Блерим Беџети, за кои, исто така, од претходно е познато дека се неформални фракционери во ДУИ.
Во дописот лиферуван до медиумите, а на кој се чита и името на ексвицепремиерот Муса Џафери, се наведува дека во партијата не постојат и не се формираат статутарните партиски органи, дека политичкото одлучување станало индивидуално, како и дека не постои дебата и консултација со базата.
„Кадровски избори се претворија во привилегија на поединецот Артан Груби, нема отчет за работата на Владата и политичката програма речиси две години. Поради нефункционирањето на организациониот живот на ДУИ, ние констатираме дека има пад на поддршката на партијата (последните избори во Тетово!). Арогантното и дилетантско однесување на извршната власт на чело со Артан Груби предизвика незадоволство, револт и пасивност на структурите и на гласачите“,
пишува во реакцијата.
Се бара од лидерот Али Ахмети да го зачува единството, да се отвори внатрепартиска дебата за надминување на состојбата и да се даде отчет од носителите на извршната власт. Писмото до медиумите беше испратено од официјалната е-маил адреса на Општина Чаир.
