Од тимот на иранскиот претседател ѝ рекле на новинарката, која израснала во Иран, дека носењето шамија е „прашање на почит“, ако се има предвид и актуелната ситуација во оваа држава каде што избувнаа масовни антивладини протести поради смртта на девојката која почина во притвор откако беше уапсена од полицијата за морал поради кршење на законот за марами
Многу учтиво одбив, вели таа, и додава: „Одбив во мое, во име на Си-ен-ен и на новинарките насекаде во светот, бидејќи тоа не е услов“
Иранскиот претседател Ебрахим Раиси го откажа долго планираното интервју со познатата новинарка на Си-ен-ен, Кристијан Аманпур, откако таа го одби неговото барање да носи шамија.
Интервјуто треба да се снима во Генералното собрание на Обединетите нации во Њујорк, а по 40 минути доцнење на договорениот термин, членови од кабинетот на Раиси ѝ кажале на Аманпур дека претседателот побарал таа да носи шамија на главата.
Таа пораснала во иранскиот главен град Техеран и течно зборува фарси, но вели дека носи шамија само додека известува од Иран за да се придржува до локалните закони и обичаи со цел да може да работи како новинарка. Меѓутоа, како што вели таа, нема да покрие главата за да направи интервју со ирански функционер надвор од Иран.
„Овде во Њујорк или на кое било друго место надвор од Иран, никогаш такво нешто не било побарано од ниту еден ирански претседател, а јас сум ги интервјуирала сите од 1995 година – во или надвор од границите на Иран“,
вели Аманпур.
Многу учтиво одбив, вели таа и додава: Одбив во мое, во име на Си-ен-ен и на новинарките насекаде во светот, бидејќи тоа не е услов.
Иранските закони наложуваат сите жени да носат покривка за глава и широка облека на јавни места. Правилото важи од Исламската револуција во 1979 година и е задолжително за секоја жена во земјата – вклучително и туристите, политичките гости и новинарките.
Според Аманпур, од тимот на иранскиот претседател ѝ рекле дека неговото барање таа да носи шамија е „прашање на почит“, имајќи ги предвид религијата и актуелната ситуација во Иран, алудирајќи на протестите што ја зафатија земјата.
Минатата недела, како што е познато, низ Иран избувнаа големи антивладини протести поради смртта на 22-годишна девојка која почина во притвор откако беше уапсена од иранската полиција за морал поради кршење на законот за носење марами.