Зеленски смета дека оваа зима може да доведе до уште поголем напредок на украинските сили доколку пристигне дополнително оружје
Украинските сили го продолжуваат својот пробив кон север во регионот Харков, а напредуваат и во другите делови на земјата по падот на руското упориште на североисток, изјави шефот на украинската армија.
Украинскиот претседател Володимир Зеленски го поздрави повлекувањето на Русија од градот Изјум во областа Харков како пресвртница во шестмесечната војна. Зеленски смета дека оваа зима може да доведе до уште поголем напредок на украинските сили доколку пристигне дополнително оружје. И украинскиот министер за надворешни работи Дмитро Кулеба вели дека успехот на Украина во борбата против Русија покажува дека можат да ги победат, но дека на Киев му треба повеќе оружје од своите партнери.
„Во регионот Харков почнавме да напредуваме не само на југ и исток, туку и на север. До границата со Русија има уште 50 километри“,
напиша на Телеграм украинскиот врховен командант Валериј Жалузни.
Тој рече дека од почетокот на месецот вооружените сили ја вратиле контролата на над повеќе од три илјади квадратни километри.
Падот на Изјум претставува најголем пораз на руската армија.
Украинците го освоија и северниот дел на Купјанск, важна железнички клучка, што значително го отежнува снабдувањето на јужниот дел од регионот на руската армија.