Денеска местото на несреќата е многу помирно и има помалку луѓе, но вештачењето продолжува. Ќе се проверува самата инфраструктура, но ќе се испитува и дали работеле автоматските забавувачи на пругата
Денеска со вештачење на железничката инфраструктура продолжува истрагата на местото на железничката несреќа во близина на местото Рајиќ кај Новска. Во несреќата загинаа машиновозачот и кондуктерот на патничкиот воз, како и 17-годишно момче. Повредени се 12 лица, од кои осум се странски државјани.
Несреќата се случи кога патнички воз што сообраќал на линијата Винковци – Новска во петокот вечерта се судрил со товарен воз кој бил запрен на тој дел од пругата поради дефект.
Златко Пјеш од ЈВП „Новска“ за „Вијести“ на ХТВ изјави дека ЈВП цела ноќ обезбедувала светло за работниците кои работеле на санацијата, а од утрото тие ја презеле улогата да ги обезбедуваат работите. Работниците на Хрватски железници почнале да ги сечат челичните делови кои треба да се ослободат.
„Товарниот воз беше одвлечен комплетно. Сега останува патничкиот воз, но пристапот до него е тежок заради теренот“,
рече Пјеш.
Тој вели дека се чека подигнување на патничкиот воз кој е превртен и се надева оти бројот на жртви ќе остане три.
Во болницата во Новиград биле примени вкупно осум пациенти од кои шестмина се задржани на лекување, а двајца од нив веќе вчера се пуштени поради полесни физички повреди. Од останатите шест, еден е хрватски државјанин, а останатите се петчлено семејство од Иран. Иранското семејство не зборува странски јазици, што ја отежнало комуникацијата со лекарите и надлежните служби, поради што во болницата пристигнале преведувачи.
Според информациите од болницата утре уште четворица пациенти би можеле да бидат отпуштени бидејќи се соочуваат со полесни повреди, а останатите двајца ќе бидат задржани на лекување. Од нив едниот е наставник од Винковци кој се здобил со тешки повреди на градниот кош, а другата е постара жена од иранското семејство која е и најтешко повредена, со повреди на рбетот.
Петар Влахов за „Вијести“ на ХТВ рече дека денеска местото на несреќата е многу помирно и има помалку луѓе, но вештачењето продолжува. Ќе се проверува и самата инфраструктура – делот од пругата каде се случи невидената трагедија. Тој посочи дека на пругата има автоматски забавувачи, па ќе се види дали тие работеле.
„Истрагата ќе продолжи, првите резултати најверојатно нема да ги знаеме уште десетина дена“,
рече Влахов.
Товарниот воз е преместен вчера, а од правец на Окучани во секој момент се очекува да пристигне кран кој ќе се обиде да ги истурка остатоците од уништениот патнички воз.