Од Народна банка препорачуваат граѓаните да избегнуваат да одат во банки, штедилници, менувачници… и банкарските услуги да ги користат преку сервисите за електронско банкарство
Народната банка апелира до граѓаните да избегнуваат користење готовина и да плаќаат со картички, како превентива од коронавирусот. Од централната банка, исто така, советуваат граѓаните да избегнуваат посета на експозитури и филијали на деловните банки, како и на штедилниците и менувачниците и банкарските услуги да ги користат преку сервисите за електронско, мобилно и телефонско банкарство.
Од Народната банка информираат дека согласно преземените мерки од денеска нема да работат за посетители музејот, библиотеката и архивот на Народната банка, нема да се одржуваат организирани посети за финансиска едукација, а приемот на налози за извршување плаќања за државата и државните органи ќе се врши до 11 часот. Подигањето документи за ефектива од трезорот ќе се врши во редовните термини од 13 до 14 часот, исклучиво преку писарницата на Народната банка, а исплатата и приемот на девизи од овластените лица на државните институции ќе се врши секој работен ден од 14 до 15 часот, исклучиво преку писарницата на Народната банка. Издавањето извештаи за податоци од кредитниот регистар ќе се врши само во вторник и четврток од 15 до 16 часот, а приемот на странки за замена на оштетени пари, за купување книжни и ковани пари за нумизматички потреби, како и на странките заинтересирани за купување ковани пари за колекционерски цели ќе се врши единствено во понеделник, во периодот од 12 до 13 часот.
Од Народната банка наведуваат дека на редовна основа го анализираат ризикот од ширење на заразата со вирусот ковид-19 и доколку е потребно, овие правила ќе бидат променети.
„Како централна банка и финансиски регулатор веќе контактиравме и со деловните банки, при што им ги соопштивме овие препораки и дадовме насоки за управување со оперативните ризици, заради намалување на можните негативни последици“,
стои во соопштението на централната банка.
Оттаму додаваат дека се преземени и дополнителни интерни мерки, при што се откажани учествата на вработените во Народната банка на конференции, семинари и обуки организирани од страна на надворешни субјекти, откажани се сите настани организирани од Народната банка, како и состаноците со надворешни субјекти.