Едната опција е продолжување на учебната година, а втората е скратени наставни програми, најави денеска министерот за образование и наука Арбер Адеми во врска со владините мерки за принуден распуст од две недели поради коронавирусот.
„Во основното образование имаме нов Закон за основно образование каде што е предвидено колку наставни денови треба да има училишната година. Исто така е предвидено јасно, кристално, чисто и концизно што треба да направат надлежните институции кога имаме прекин на наставата поради епидемија и вонредни состојби. Имаме две опции. Училишната година не мора да заврши на 10 јуни. Втората опција е подготвување скратени наставни програми. Пред да се определиме за која било опција треба да се измени и дополни годишниот календар за организирање на настава. Така што образовните институции ќе бидат навремено известени од нашата страна. Ова изменување и дополнување на календарот може да се направи и сега и по 14 дена, зависно со какви ситуации и состојби ќе се соочиме“,
рече Адеми на прес-конференцијата во седиштето на ДУИ.
За средните училишта, според Адеми, наставата може да се организира за време на викенди или со скратени програми.
Тој апелира до општините и до самите раководства на училиштата да организираат дезинфекција на образовните институции, конкретно на основните и средните училишта.
Заменик-министерот за здравство Арменд Аслани упати апел до сите граѓани што доаѓаат од ризичните реони при премин на граничните премини да даваат точни информации за да се избегне ширење на коронавирусот.
*Поврзани вести
(ФОТОГАЛЕРИЈА) Училиштата испразнети, наставата ќе се реорганизира
Од утре во Македонија се затвораат сите градинки, училишта и факултети поради коронавирусот