Албанскиот премиер денеска ѝ беше домаќин на финската премиерка Сана Марин
Албанскиот премиер Еди Рама ѝ се заблагодари на финската премиерка Сана Марин за поддршката што Финска ја дава за земјите од Западен Балкан во патот кон ЕУ. На денешната средба во Тирана, Рама додаде дека кога која било друга ЕУ-членка „вади опашки“ од внатрешнополитички причини, тој се потпира на искреноста на Финска.
„Со премиерката разговаравме за тоа што доаѓа или што не доаѓа во наредните денови во врска со официјалното отворање на преговорите за членство на Албанија и Северна Македонија преку меѓувладини конференции. Јас ѝ реков на премиерката дека не очекувам ништо ново на овој Совет, но земјите на ЕУ до крај, вклучително и Финска, се обидуваат со Бугарија да отворат пат на разумот и да го ослободат процесот и за ова ние сме многу благодарни“,
кажа Рама.
Рама додаде дека Албанија сесрдно го поддржува членството на Финска и Шведска во НАТО.
Премиерката на Финска, Сана Марин, ја изрази поддршката на нејзината земја за членството на Албанија во Европската Унија. На прес-конференцијата, за време на посетата на Албанија, Марин рече дека членството на Западен Балкан во ЕУ е важно во време кога Европа се соочува со закана од руска агресија.
„Финска е долгорочен и силен поддржувач на проширувањето на ЕУ. Сакаме да ги видиме сите земји од Западен Балкан да се приклучат во ЕУ откако ќе ги исполнат критериумите. Наш приоритет е да ги започнеме пристапните преговори со Северна Македонија и Албанија без одлагање, сакаме да ја поддржиме Албанија за нејзиното членство во ЕУ“,
рече Марин.
Српскиот претседател Александар Вучиќ на Инстаграм соопшти дека утринава преку видеоврска разговарал со премиерите Еди Рама и Димитар Ковачевски, во врска со претстојниот Самит во Брисел.
„Се договоривме дека по консултации со нашите влади и советници, утре напладне ќе ја објавиме одлуката за тоа дали ќе присуствуваме на овој собир“,
објави Вучиќ.