Премиерот вчера најави дека ќе се реафирмира ставот за одржување на редовни парламентарни избори во 2024 година, заедно со претседателските. Меѓутоа, со оглед дека времето на средбата коинцидира со доставувањето на францускиот предлог за кревање на ветото, шефот на дипломатијата денеска рече дека не ја исклучува можноста и тоа да биде доминантна тема и рече дека е подготвен да присуствува и да ги објасни нашите ставови
Премиерот и лидер на СДСМ, Димитар Ковачевски, утре во владата ќе седне на заедничка маса со лидерите од владината коалицијата, по што, според најавите ќе одржи и прес-конференција на која ќе присуствуваат и партнерите.
Како што најавија денеска од владата, предвидено е средбата да започне во 13 часот, но оттаму не соопштија повеќе детали за темите за кои ќе се разговара.
Меѓутоа, вчера Ковачевски најави дека идејата е на средба ќе го реафирмираат ставот за одржување редовни парламентарни избори во 2024 година, заедно со претседателските.
Граѓаните, рече премиерот, ќе се уверат дека има владејачко мнозинство и влада која се грижи за животниот стандард и обезбедување на сè што треба во време на криза.
Според неговата изјава, се очекува да се зборува и за тоа што досега е направено за справување со кризата, но и какви мерки ќе се преземат во иднина.
„Меѓу другото, ќе информираме за мерките што ќе бидат преземени, а се вцртани во ребалансот, ќе направиме и осврт и на кризата како од аспект на енергетската криза, кризата со растечките цени на светските берзи во однос на храната, на енергенсите суровините предизвикани од нападот на Русија врз Украина“,
изјави вчера Ковачевски.
Веројатно како тема на утрешната средба ќе се наметне и францускиот предлог што беше доставен до властите во Бугарија за кревање на ветото за почетокот на преговорите. Шефот на дипломатијата, Бујар Османи, денеска изјави иако средбата на коалицијата била закажана уште претходно, со оглед дека коинцидира со доставување на предлогот не ја исклучува можноста тоа да биде доминантна тема.
„Така што (средбата) беше поврзана со општите случувања, војната во Украина, економската и енергетската криза. Се разбира, европските перспективи. Јас не исклучувам дека поради тоа што коинцидира со пуштањето на овој предлог дека нема да биде доминантна тема, но, не беше обмислена таа средба за ова прашање. Беше едноставно да се информираат коалициските партнери за сите прашања коишто се случуваат, меѓутоа, да, доколку тие бараат јас сум подготвен да присуствувам и во функција да ги објаснам нашите ставови. Но, сметам дека треба прво да видиме што ќе се случи во Софија, што ќе се случи во земјите членки, а потоа да ги комуницираме нашите ставови“,
рече денеска Османи.