Во емисијата „360 степени“ на ТВ Алсат тој кажа дека седум години по ред прават истражувања во девет градови низ Македонија за односот на граѓаните кон селектирањето на отпадот
Последниве години имаме подобрување на свеста кај граѓаните за примарна селекција на отпадот, вели Филип Ивановски, извршен директор на „Пакомак“, непрофитна компанија за управување со отпад од пакување. Во емисијата „360 степени“ на ТВ Алсат тој кажа дека седум години по ред прават истражувања во девет градови низ Македонија за односот на граѓаните кон селектирањето на отпадот.
„Барем декларативно, 90 отсто од граѓаните сакаат да го селектираат отпадот или над 50 отсто велат дека тоа го прават често или понекогаш. Пред седум-осум години тие проценти беа многу помали. Граѓаните сакаат да прават примарна селекција, а главна причина зошто тоа не го прават е недостатокот на контејнери“,
вели Ивановски.
Според него, луѓето што живеат на места на кои се достапни контејнери за селектиран отпад изразуваат поголема подготвеност да го селектираат отпадот.
„Тоа посебно се гледа во делот на стаклена амбалажа, бидејќи тие контејнери се со посебен мал отвор, не се предмет на вандализација од неформалниот сектор итн. Можам да кажам дека за помаку од шест години, колку што собираме стакло од општините, ние веќе сме дојдени до количини koi претставуваат 30 отсто од тоа што во Македонија се генерира како стакло, што се пушта на пазарот. Тоа не би можеле да го правиме ако граѓаните не се совесни и не прават примарна селекција на отпадот“,
смета тој.
Ивановски вели дека работат и на поттикнување на граѓаните да го селектираат отпадот, особено пластичните шишиња и лименките, за кои, освен повикот за повисока свест, им се нуди и финансиски надомест за да ги одлагаат на посебно место. Тој ги повика државата и општините да почнат да преземаат мерки за граѓаните кои не го селектираат отпадот, а имаат можност за тоа.
„Прво што треба да направат општините е граѓаните да плаќаат онолку колку што создаваат отпад. Значи, тој што создава отпад треба повеќе да плаќа, а тој што рециклира и не создава толку отпад, ќе плаќа помалку. Значи, финансиска мотивација, но не на страна на наградување, туку ги казнувате повеќе да плаќаат ако не го селектираат отпадот“,
додава Ивановски.
Според истражувањата на „Пакомак“, десет отсто од граѓаните изречно велат дека не сакаат да селектираат отпад, без да објаснат зошто.