Русија во последните недели целосно ја укина испораката на гас за повеќе европски земји поради воведените санкции против неа како резултат на воената инвазија на Украина, како и поради тоа што европските земји одбива да го плаќаат гасот во рубли
Руската компанија „Газпром“ од денеска започна да ја намалува количината на гас што ѝ ја испорачува на Германија преку гасоводот „Северен тек 1“ на дневен максимум од 67 милиони кубни метри.
Редуцирањето на снабдувањето со гас доаѓа по најавата дека оваа компанија ќе ги намали максималните количини за достава на гас од 167 милиони кубици дневно на 100 милиони кубици.
Со најновото редуцирање, „Газпром“ во два дена ја намали испораката на гас во Германија за околу 60 отсто, а токму „Северен тек 1“ е главниот гасовод преку кој оваа земја се снабдува со руски гас.
Германија ја критикува Русија
Германскиот министер за економија Роберт Хабек ја обвини Русија дека со овој потег се обидува да ги зголеми цените на гасот, но додаде дека Германија и натаму може да обезбеди алтернативни резерви на гас, но по повисока цена. Германските резерви со гас моментално се на 56 отсто од целиот капацитет.
Руски „Газпром“, кој во најголем дел е во државна сопственост, извести дека застојот во испораката со гас се должи на поправки на единицата за компресија на гас, иако германската федерална агенција ги оспори овие тврдења.
Русија во последните недели целосно ја укина испораката на гас за повеќе европски земји поради воведените санкции против неа како резултат на воената инвазија на Украина, како и поради тоа што европските земји одбиваа да го плаќаат гасот во рубли, нешто што Русија го побара со цел да ја зајакне својата валута.
Цената на енергентите значително се зголеми поради намалениот доток на гас од Русија во Европа, а многубројни енергетски аналитичари стравуваат дека Русија би можела да ги затвори сите вентили за Европа со цел да изврши притисок за укинувањето на санкциите кон неа.