Партијата и понатаму ќе дејствува како опозиција и најавува дека ќе се подготвува за самостоен настап на следните парламентарни избори
Партијата ГРОМ донесе и официјална одлука да ја раскине коалицијата со ВМРО-ДПМНЕ откако нејзиниот лидер и градоначалник на Карпош, Стевчо Јакимовски, пред една недела стави крај на соработката.
Од партијата денеска преку соопштение информираа дека одлуката е донесе вчера на седница на Централниот одбор (ЦО) на партијата.
„Точка за одлучување од круцијално значење на Централниот одбор беше напуштање на коалицијата со ВМРО-ДПМНЕ. По исцрпната дебата, Централниот одбор донесе одлука за раскинување на коалицијата со ВМРО-ДПМНЕ“,
велат од ГРОМ.
Од партијата велат дека одлучиле и понатаму да дејствуваат како опозиција и да се подготвуваат за самостоен настап на следните парламентарни избори.
За прекинот на соработката со најголемата опозициска партија ВМРО-ДПМНЕ, претседателот на ГРОМ информираше пред една недела обвинувајќи дека како градоначалник се соочува со опструкции, подметнувања, омаловажувања и навреди. За распадот на коалицијата Јакимовски го обвини директно Христијан Мицкоски.
„Морам да кажам дека во ВМРО-ДПМНЕ имам драги луѓе и пријатели, жал ми е и им се извинувам на членовите на ВМРО-ДПМНЕ кои искрено ме поддржале во изборната кампања и апсолутно имам респект кон тоа што тие ме поддржале и сè што имаме договорено и секоја обврска што ја имам кон членовите на ВМРО-ДПМНЕ ќе биде испочитувана и никому во Општина Карпош нема да му фали ’влакно од косата‘, како што не му фали ниту на некој од СДСМ или од некоја друга политичка партија“,
рече Јакимовски.
Зборувајќи за тоа какви за какви опструкции и притисоци станува збор, тој тогаш истакна дека постојано биле упатувани закани до стопанственици од Карпош за тоа дека тие ќе биле сменети кога на власт ќе дошла ВМРО-ДПМНЕ.
Мицкоски, пак, тогаш одговори дека ако има некакви индиции, лидерот на ГРОМ треба да ги пријави кај институциите.
„Со господинот Јакимовски немам комуникација уште од пред нова година, тогаш еднаш или два пати се видовме да му честитам на тоа што беше избран за градоначалник, ги отфрлам овие навреди, вчудовиден сум, претпоставувам ако има такви индиции треба да соработува со органите на прогонот и да го пријави, го охрабрувам да го пријави затоа што во спротивно ако не го пријави со тоа што го кажува станува соучесник, нели, ја скрива правдата“,
изјави претседателот на ВМРО-ДПМНЕ.