Главните дискусии се воделе околу економските и енергетските последици од оваа војна врз регионот и ситуацијата во Косово и Босна и Херцеговина
За преговорите со Северна Македонија и Албанија станало збор во контекст на изменетата геополитичка состојба, но Бугарија останува на тврдиот став и шансите за деблокирање на процесот се многу мали, велат дипломати за МИА
Премиерот Димитар Ковачевски, неговите колеги од регионот и еврокомесарот за проширување Оливер Вархеји вчера учествуваа на неформална лидерска организирана од шефот на ЕУ-дипломатијата Жозеп Борел, во контекст на војната на европскиот континент и без многу детали за јавноста, јави МИА од Брисел.
Македонскиот премиер Ковачевски кусо само се обрати синоќа пред почетокот на вечерата, без можност за прашања од новинарите, каде што повтори дека проширувањето кон Западен Балкан и отпочнувањето на преговорите со Северна Македонија, блокирани од Бугарија, се безбедносно прашање за Европа.
„За Северна Македонија ќе разговараме со потпретседателот Борел за потребата од итно отворање на преговорите и одржувањето на првата меѓувладина конференција помеѓу ЕУ и Северна Македонија бидејќи проширувањето на ЕУ не е само економски или политички процес туку во контекст на новите геополитички настани со војната во Украина, станува прашање на безбедност за Западен Балкан“,
изјави синоќа Ковачевски.
Ниту Борел не даде детали за дискусиите кои се одржаа вчера помеѓу шесте премиери и претседатели од регионот, на кои првпат им се придружи лидерот на Република Српска, Милорад Додик.
„Фокусот на дискусиите во средата беа глобалните и регионалните последици од нелегалната и неиспровоцираната војна на Русија против Украина и нејзиниот народ и како ЕУ и партнерите од Западен Балкан можат заедно да се справат со штетните последици од оваа војна врз цените на храната и енергијата и регионалната и глобалната стабилност“,
велат прес-службите на Борел.
На маса било усогласувањето на регионот со санкциите на ЕУ, во овој дел Северна Македонија е меѓу најдобрите ученици, но проблем претставува Србија. Шефот на ЕУ-дипломатијата им повторил на лидерите од регионот дека е важно да се ограничи капацитетот на Москва да ја финансира војната.
За преговорите со Северна Македонија и Албанија станало збор во контекст на изменетата геополитичка состојба, но Бугарија останува на тврдиот став и шансите за деблокирање на процесот се многу мали, велат дипломати за МИА.
Главните дискусии се воделе околу економските и енергетските последици од оваа војна врз регионот и ситуацијата во Косово и Босна и Херцеговина.
Оваа вечера се организира неформално како начин да се опипа пулсот на лидерите пред претстојниот Совет на ЕУ за надворешни работи кој ќе се одржи в понеделник во Брисел. На овој совет министрите за надворешни на ЕУ ќе имаат неформална размена на мислење со нивните колеги од земјите од Западниот Балкан.