Во врска со користењето нуклеарно оружје, директорката на американското разузнавање вели дека Путин би се решил на таков чекор само ако смета дека постои егзистенцијална закана за Русија
Рускиот претседател Владимир Путин се подготвува за долга војна во Украина, а дури и потенцијална победа на истокот од земјата нема да стави крај на конфликтот, предупредуваат службите на американското разузнавање.
Предупредувањето доаѓа додека во источна Украина се водат жестоки борби во кои Русија се обидува да окупира територија. Трупите на Москва сега повторно се фокусирани на регионот Донбас откако Украинците пружија отпор при обидот да биде заземен главниот град Киев.
Меѓутоа, директорката на националното разузнавање Аврил Хејнс на вчерашното сослушување во Сенатот на САД кажа дека Путин сè уште има намера да освои цели надвор од Донбас. Тој, според кажаното, сепак „се соочува и со неусогласеност меѓу неговите амбиции и моменталните конвенционални воени способности на Русија“.
Според неа, рускиот претседател веројатно се надева оти поддршката што САД и ЕУ ѝ ја пружаат на Украина ќе ослабне поради инфлацијата, недостигот на храна и цените на енергенсите кои се влошуваат.
Хејнс кажа и дека додека војната продолжува, Путин би можел да се сврти кон „подрастични средства“, иако, како што нагласи, тој би можел да употреби нуклеарно оружје само ако смета дека постои егзистенцијална закана за Русија.