Германскиот канцелар Олаф Шолц изјави дека го охрабрил премиерот на Косово, Албин Курти, на конструктивна соработка во преговорите со Србија. Како што изјави шолц на пресот за медиумите по состанокот со Курти во Берлин, целта на Бриселскиот дијалог е сеопфатен договор кој ќе донесе стабилност во регионот, пренесува Клан Косово.
„Го охрабрив Албин Курти на конструктивна соработка во преговорите. На крајот на краиштата, тоа е прашање од корист за луѓето во двете земји од Западен Балкан. Овој регион е дел од Европа и сите негови земји мора да станат дел од ЕУ, а секако дека и Косово е дел од тоа“,
изјави Шолц.
Преку берлинскиот процес, како што најави Шолц, ќе бидат постигнати четири договори кои ќе се однесуваат на слобода на движење и признавање на дипломите, пренесе Економија онлајн.
„Најважниот актуелен проект е создавање на заеднички регионален пазар“,
порача германскиот канцелар Олаф Шолц на заедничката конференција со Курти.
Шолц истакна и дека Германија е подготвена да ја поддржи Приштина и дека е од витално значење да се постигне напредок во борбата против корупцијата и владеењето на правото, за што приштинската Влада поставила цели.
„Напредок не се постигнува преку ноќ, но клучно е на младите луѓе да им се отворат нови перспективи и можности. Задоволен сум од заедничката посветеност на нашите лада во области кои ќе му помогнат на Косово да добие енергетска независност и да се зајакне квалитетот на воздухот“,
рекол Шолц.
Тој додал и дека мора да се постигне понатамошен напредок во либерализацијата на визниот режим.
Шолц пред новинарите рекол и дека тој и Курти имале продуктивен разговор и дека важна тема била и војната во Украина.