Централна тема на сесиите, како што соопштија од МНР, беше актуелната безбедносна состојба поради руската воена инвазија во Украина, како и мерките и активностите што Алијансата ги презема за гарантирање на безбедноста на сите земји членки на НАТО и за новиот Стратегиски концепт, кој треба да одговори на новата геополитичка реалност и да постави идна стратегиска визија за Алијансата
Министерот за надворешни работи Бујар Османи денеска учествуваше на редовниот состанок на Северноатлантскиот совет на ниво на министри за надворешни работи, кој се одржа во седиштето на НАТО во Брисел.
Централна тема на сесиите, како што соопштија од МНР, беше актуелната безбедносна состојба поради руската воена инвазија во Украина, како и мерките и активностите што Алијансата ги презема за гарантирање на безбедноста на сите земји членки на НАТО и за новиот Стратегиски концепт, кој треба да одговори на новата геополитичка реалност и да постави идна стратегиска визија за Алијансата.
На посебна сесија на која учествуваа и министрите за надворешни работи од партнерските земји, како и високиот претставник на ЕУ, Жозеп Борел, станало збор за односите на НАТО со партнерите и начинот за натамошно унапредување на соработката и поддршката од страна на Алијансата, а со цел зајакнување на нивната отпорност.
Од МНР соопштија дека Османи и во оваа пригода најостро ја осуди руската агресија во Украина, особено грозоморните убиства на цивилното население и повика на итен прекин на огнот, при што ја реафирмира нашата солидарност со Украина. Воедно, ја нагласи неопходноста за натамошно зајакнување на присуството на НАТО во Западен Балкан, како регион подложен на зголемено влијание од страна на трети држави.
„Западен Балкан е неизоставен дел од идната безбедносна структура во Европа. Затоа евроатлантската и европската интеграција на Западен Балкан е безбедносно прашање и алатка за зајакнување на стабилноста. Оттука упатуваме јасна порака за што поскоро отпочнување на пристапните преговори со Северна Македонија и Албанија, што е од круцијално значење за зачувување на регионалната и европската безбедност“,
истакнал Османи, соопшти МНР.