Зошто се повлечени измените за правно признавање на полот, не ѝ е јасно и на пратеничката и претседателка на ДОМ, Маја Морачанин, која во емисијата „360 степени“ посочи дека наспроти сегашните спротивставувања на одредени пратеници, изминатиот период се организирани низа средби и настани на оваа тема и „во ниту еден момент ниту еден од пратениците“ јавно не кажал дека е против законот и не дал аргументи
Повлекувањето од Собранието на предлог-измените на Законот за матична евиденција, со кои се овозможува правно признавање на родот, не е решение, вели адвокатката Наташа Бошкова, која го застапуваше лицето Х во случајот против Северна Македонија пред Европскиот суд за човекови права (ЕСЧП) во Стразбур.
„Мислам дека со овој потег Владата покажа дека нема демократски капацитет во Собранието да ги разговараме спротивставените аргументи на одредени пратеници и таму да изнајдеме решение за унапредување или подобрување на текстот на законот. Повлекувањето на законот не е решение на проблемот“,
рече Бошкова во вечерашното издание на емисијата „360 степени“ на Алсат ТВ.
Бошкова е и правна советничка на Коалицијата Маргини, а беше дел и од работната група која ги подготвуваше законските измени, па затоа е и разочарана, со оглед на тоа што од самиот почеток е сведок на тоа како течеле консултациите и подготовките за законските измени кои Владата неочекувано ги повлече еден ден пред да се најдат пред Комисијата за политички системи во Собранието со објаснување дека е потребно доусогласување на други одредби.
„Од 2018 г. беше формирана работна група во Министерството за правда (МП) за подготовка на измените на Законот за матична евиденција. Тука членуваа претставници на сите институции, засегнати кои ќе треба да го спроведуваат овој закон: МВР, МП, Управата за водење матични книги, Агенцијата за заштита на личните податоци, претставници на граѓански организации, а преку нив беа претставени и барањата на транс-заедницата. Сите консултации од 2018 г. до денес одеа во насока на донесување на закон што ќе значи минимум спроведување на пресудата ‘Х против Македонија’“,
вели Бошкова.
Зошто се повлечени измените, не ѝ е јасно и на пратеничката и претседателка на ДОМ, Маја Морачанин, која инаку е координаторка на интерпартиската парламентарна група за унапредување на правата на ЛГБТИ луѓето.
„Немам објаснување, бидејќи немаше никаква најава ниту консултации помеѓу Владата и пратениците дека ќе се повлекува законот и дека има нешто што треба да се доработи. Се согласувам со коментарот дека од сосема други причини се објаснува повлекувањето на законот, а не ова што е суштина на овој предлог-закон за матична евиденција – правно признавање на родот“,
рече Морачанин која, исто така, беше гостинка во емисијата „360 степени“ на Алсат ТВ.
Пратеничката потсетува дека темата за признавањето на родот на трансродовите лица подолго време неформално е отворена во Собранието, како и дека уште по пресудата на ЕСЧП за лицето Х против државата поставила пратеничко прашање до поранешниот премиер Зоран Заев, кој уште тогаш кажал дека се во тек законски измени. Таа посочува и дека наспроти сегашните спротивставувања на одредени пратеници, изминатиот период се организирани низа средби и настани на оваа тема, и во ниту еден момент ниту еден од пратениците јавно не кажал дека е против законот и не дал аргументи.
„Во неколку наврати заедно со претставниците од невладините организации во Собранието интерпартиската група за ЛГБТИ луѓето организираше неколку настани, еден од нив беше во ноември минатата година како дел од проектот на Советот на Европа. Сите пратеници беа поканети, невладиниот сектор, имаше учесници од странство, од Совет на Европа, имаше дебата, поширока јавна расправа. И во ниту еден момент во сите тие средби со пратениците не слушнав некој јавно да каже дека е против законот и да даде аргументи“,
раскажа Морачанин.
Инаку, во објаснувањето кое го даде Министерството за правда пишуваше дека тоа се прави за усогласување со други одредби:
„Се повлекува поради доусогласување со Закон за матична евиденција поради потребата за реформирање на системот на регистрација на новородени деца со оглед на фактот што законските одредби се застарени и не одговараат на реалната состојба со која се соочува нашиот правен систем. Од друга страна пак, законското решение е застарено во поглед на неевидентираните лица и истиот е потребно дополнително да се усогласи со Законот за неевидентирани лица во матична книга на родени којшто е донесен во 2020 година. Законското решение со кое се уредува системот на евиденција во матичните книги на родени, венчани и умрени треба да ги пресретне брзите промени на современите текови. Од таа причина, потребно е да се има предвид и процесот на дигитализација и интероперабилност“,
рекоа од Министерството за правда.