Министерството за здравство соопшти дека негативни се резултатите на коронавирус кај пациентката која утрово се јавила со знаци на респираторна инфекција на Клиниката за инфективни болести и фебрилни состојби во Скопје. Пациентката патувала во критичниот регион на Северна Италија и на 26 февруари влегла во земјава.
Засега нема нов случај на заразен со коронавирус. Единствената пациентка којашто се лечи на инфективната клиника е во добра општа состојба.
„Продолжуваме редовно да ја информираме јавноста. Нема простор за паника. Апелираме до граѓаните да ги почитуваат препораките на ресорното министерство“, велат од ресорното министерство.
Претходно, министерот за здравство Венко Филипче изјави дека разговарал со генералниот конзул на Северна Македонија во Венеција – Италија, кој му рекол дека нема информации за македонски државјанин заразен со коронавирус или задржан во изолација во тој дел од земјата.