Според најавата, од Скопје повторно ќе може да се лета до Билунд, Бремен, Рим-Чампино, Турку и Векше и од Охрид до Фридрихсхафен и Меминген
Нискобуџетната авиокомпанија „Виз ер“ денеска најави дека започнува со постепено повторно отворање на седум линии и воведување на две нови линии од Скопје и Охрид до дестинации во седум држави, почнувајќи од крајот на март и мај.
Според најавата, од Скопје повторно ќе може да се лета до Билунд, Бремен, Рим-Чампино, Турку и Векше и од Охрид до Фридрихсхафен и Меминген.
„Виз ер“ отвора и две нови линии: Охрид – Лондон, Лутон и Скопје – Малта.
Авиолиниите Охрид – Фридрихсхафен и Охрид – Мемингем почнуваат од 28 март, а од тој датум ќе се лета и на рутата Скопје – Билунд.
За Охрид-Лондон Лутон, Скопје – Рим Чампино и Скопје – Турку, како стартен датум е поставен 21 март, а 23 мај за Скопје-Бремен, Скопје-Малта и Скопје-Векше.
Резервациите за повторно отворените рути се веќе достапни.
Во интервју за МИА, Метин Батак, генерален директор на ТАВ Аеродроми викендов најави дека со летниот распоред на летање што стартува на 28-ми месецов, покрај новата авиолинија Скопје-Софија, на аеродромите во државава се враќаат неколку рути што функционираа пред ковид пандемијата. Се очекува и враќање на полски ЛОТ со линијата за Варшава.