Комисијата на денешната седница донела уште две препораки: Да се зголеми капацитетот на исполнетост на објекти од затворен тип како театри, кина, опери, на 75 отсто, за разлика од досегашните 50 отсто, и да не се бараат ковид-сертификати за гости во отворен дел од угостителски објекти
Комисијата за заразни болести денеска препорача учениците во основните училишта да бидат ослободени од носење маски во школите, но оваа обврска останува за наставниците, професорите и административно- техничкиот персонал.
„Оваа препорака значи дека не е задолжително носењето маски за децата во основното образование, но ако некој сака да носи маска, од различни причини, не е забрането. Но обврската за задолжително носење маски кај децата се укинува, а останува да важи за наставниот кадар и административно-техничкиот“,
рече д-р Злате Мехмедовиќ.
На прашањето дали сите членови на Комисијата биле „за“ оваа препорака, претседателот на Комисијата Александар Петличковски рече дека имало дискусија, но на крајот со „солидно“ мнозинство била усогласена оваа препорака.
Од друга страна, нема промени во начинот за изолација кој досега се применуваше, доколку има заболен ученик во едно одделение.
Мехмедовиќ објасни дека препораката е донесена врз основа на проценката на епидемиолошкиот ризик и според тие параметри се наоѓаме во зелена зона и следењето на овие параметри активно продолжува. Доколку има влошување на состојбата или епидемиолошкиот ризик, може да се вратат истите препораки и мерки.
„На ваков начин со постепено олабавување на мерките ако успееме да ја исконтролираме состојбата со постепено олабавување, сакаме да избегнеме да се доведеме до состојба како Германија, Британија и Данска, со нагло зголемување на заразените и хоспитализираните“,
рече Мехемдовиќ.
Комисијата на денешниот состанок усвоила уште две препораки, и тоа:
- да се зголеми капацитетот на исполнетост на објекти од затворен тип како театри, кина, опери, на 75 отсто, за разлика од досегашните 50 отсто и
- да не се бараат ковид-сертификати за гости во отворен дел од угостителски објекти.
Ваквите препораки се донесени врз основа на проценката на епидемиолошката состојба во изминатата недела.
„Оваа моментална состојба ни дава простор да здивнеме и да се занимаваме со вакцинацијата, со нејзино рекламирање. Ние не ја заклучуваме пандемијата, не знаеме што ќе се случи за еден месец, не па за два-три. Имавме интензивирање и тоа ќе го засилиме, има резултат од потсетувањето и тоа прво кај тие со поголем ризик, а потоа и кај оние кои примиле две дози и поминало подолго време. Стандард е три дози“,
рече Петличковски.