Поради неисплатените материјални трошоци, машинскиот и извршниот персонал неколку часа ја блокираше работата и минатата недела, но бојкотот беше прекинат по ветувањето што го добиле од раководството за исполнување на поставените барања. Сега, повторно се на бојкот
Денеска, од 15 часот попладне, патничкиот и товарниот железнички сообраќај во земјава повторно ќе биде запрен поради бојкот на машинскиот и извршниот персонал од „Железници транспорт“.
Бојкотот, како што изјави претседателот на Синдикатот на машиновозачи на Македонија, Тони Димовски, ќе биде поради тоа што сè уште не им биле исплатени материјалните трошоци за февруари.
Поради неисплатените материјални трошоци, машинскиот и извршниот персонал неколку часа ја блокираше работата и минатата недела, но бојкотот беше прекинат по ветувањето што го добиле од раководството за исполнување на поставените барања.
Димовски за МИА изјави дека сè уште не им е исплатен и првиот дел од платата за февруари, за што рокот е до денеска. Се очекува прашањето за Железници на РСМ да биде отворено денеска на седница на Владата, а од исходот, како што вели Димовски, ќе зависи реализацијата на бојкотот.
Тој повтори дека стапуваат во бојкот согласно со одлуката што претходно ја доставија до раководството минатиот ноември, а според која, доколку до 10 во месецот не им бидат исплатени материјалните трошоци за претходниот месец, ќе ја прекинат работата наредниот ден.
Исто така, според одлуката, доколку до 25 во тековниот месец не им биде исплатена платата за претходниот месец во целост, наредниот ден ќе стапат во бојкот.
Според Димовски, со бојкотот ќе бидат опфатени патничките возови според планираниот возен ред по 15 часот на релациите Скопје – Табановце и обратно (16.25), Скопје – Гевгелија (16.55) и Скопје – Велес (22.40), како и сообраќањата на планираните три товарни воза.