„Европската комисија е спремна да им обезбеди соодветна заштита на сите оние што бараат засолниште и оние што бараат безбеден пат до дома“, напиша претседателката на Европската комисија на својот твитер-профил и во продолжение го објави планот на Комисијата за привремена заштита на украинското население кое ја напушта Украина
Европа стои до оние на кои им е потребна заштита. Сите оние што бегаат од бомбите на Путин се добредојдени во Европа, напиша на својот твитер-профил претседателката на Европската комисија, Урсула фон дер Лајен.
Во твитер-статусот, таа додава „Европската комисија е спремна да обезбеди соодветна заштита на сите оние што бараат засолниште и оние што бараат безбеден пат до дома“, а во продолжение го објави и планот на Комисијата за привремена заштита на украинското население кое ја напушта Украина.
Во документот, меѓу другото, се наведува дека на бегалците од Украина ќе им биде обезбедена потребната помош тргнувајќи од олеснување на преминот на границите, хуманитарна помош, дозвола за престој, а ќе имаат и пристап до образование и до пазарот на трудот.
„Европската комисија предложи активирање на Директивата за привремена заштита за брза и ефикасна помош на луѓето кои бегаат од војната во Украина. Според овој предлог, на оние кои бегаат од војната ќе им биде дадена привремена заштита во ЕУ, што значи дека ќе добијат станбена дозвола и ќе имаат пристап до образование и пазарот на трудот“,
стои во документот.
Покрај тоа, Комисијата ќе издаде и оперативен водич, кој ќе има за цел да им помогне на граничните служби на земјите-членки да извршат ефикасен прием на бегалците на границите со Украина, притоа одржувајќи високо ниво на безбедност.
Водичот, исто така, препорачува земјите членки да воспостават специјални линии за итни случаи за канализирање на хуманитарната помош и потсетува на можноста за доделување пристап на ЕУ врз хуманитарни причини.
Европскиот совет, пак, треба да го усвои предлогот за привремена заштита, за кој веќе изрази широка поддршка на вонредна седница на 27 февруари, а за него ќе се расправа утре. Откако ќе биде усвоена, привремената заштита ќе стапи во сила веднаш и ќе важи една година. Овој период може да се продолжи двапати на периоди од шест месеци, до една година.
Европската комисија може во секое време да му препорача на Советот да ја прекине привремената заштита, доколку ситуацијата во Украина дозволува безбедно и одржливо враќање на оние на што им е одобрена привремена заштита, или да ја продолжи за уште една година.