Херсон е важно пристаниште и индустриски центар, а оттаму руските сили би можеле да навлезат кон внатрешноста и западниот брег на Украина. Но, овој град е важен и за анексираниот Крим
Официјална Москва тврди дека го има градот Херсон под целосна контрола, но засега сè уште има различни извештаи за ситуацијата таму.
За разлика од руските тврдења, регионалниот гувернер вели дека градот е целосно опколен, што е различно од тврдењето дека е веќе опседнат од Русите. И градоначалникот на Херсон се огласи со објава: „Не, сè уште сме Украина“.
Зошто на Русија ѝ е важно освојувањето на овој град?
Херсон се наоѓа на југот од Украина, кај каналот Северен Крим и има речиси 300 000 жители. Доколку градот „падне“, би бил најголемиот што досега го зазеле руските сили и ќе биде стратегиски важен бидејќи ќе претставува база од каде што руската војска ќе се обиде да навлезе понатаму во внатрешноста на Украина и кон запад по должината на брегот на Црното Море, правец во кој се наоѓа пристанишниот град Одеса.
И Херсон самиот по себе, анализира Би-би-си, е важно пристаниште на Црното Море и претставува индустриски центар.
Да се има овој град под контрола значи да се контролира и главниот извор на вода. Со анексијата на Крим во 2014 година најголем дел од снабдувањето со свежа вода за Крим беше прекинато што предизвика голем недостиг во анексираниот регион. Така, со заземањето на Херсон под контрола, најверојатно една од првите цели на Русија ќе биде да го деблокира водоснабдувањето за Крим.