Санкциите се воведени против поединци и организации поради улогата што земјата ја има во руската инвазија на Украина
Велика Британија воведува санкции кон Белорусија поради улогата во руската инвазија на Украина, објави британската влада.
Секретарката за надворешни работи Лиз Трас рече дека санкциите се воведени против поединци и организации поради улогата што земјата ја има во руската инвазија на Украина.
Замрзнат имот и забрана за патување е воведена за Виктор Гулевич, началник на Генералштабот на армијата на Белорусија и прв заменик министер за одбрана.
„Тој е одговорен за насочување на акциите на белоруските вооружени сили, кои ја поддржаа и овозможија руската инвазија врз Украина. Тој нареди заеднички воени вежби со Русија и се согласи на распоредување на руски војници долж границата на Белорусија со Украина, што директно придонесе за способноста на Русија да ја нападне Украина, вклучително и од позициите во Белорусија“,
соопшти британското Министерството за надворешни работи.
Исто така, санкционирани се генерал-мајор Андреј Бурдико, заменик министер за одбрана за логистика и началник за логистика на белоруските вооружени сили; заменик-министер за одбрана и началник за вооружување, генерал-мајор Сергеј Симоненко; и заменик-министерот за одбрана, генерал-мајор Андреј Жук.
„Режимот на Лукашенко активно ја помага и поддржува илегалната инвазија на Русија и ќе биде натеран да ги почувствува економските последици од неговата поддршка за Путин“,
порача Трас.