Шефот на руската дипломатија, во видеообраќање, обвини дека Украина се обидува да набави нуклеарно оружје и рече дека Москва не може да не одговори на „таква реална опасност“
Повеќето дипломати од европските земји ја напуштија денешната конференција на Советот за човекови права на Обединетите нации (УН ХРЦ), во момент кога почна обраќањето на шефот на руската дипломатија Сергеј Лвров.
Гестот на амбасадорите, како што се наведува, е во знак на солидарност со Украина која е нападната од Русија.
„Во знак на солидарност со Украина, амбасадорите на ЕУ и другите одлучија да ја напуштат просторијата кога министерот за надворешни работи Лавров се обрати на УНХРЦ и на Конференцијата за разоружување. Не може да се очекува од нас да седиме додека Русија активно шири дезинформации и невистини во врска со нејзината агресија против Украина“,
се наведува во објава на УН ХРЦ на Твитер.
As a sign of solidarity EU Ambassadors & others decided to leave w Ukraine the room when FM Lavrov addressed @UN_HRC & Conference on Disarmament. We cannot be expected to sit by while Russia is actively spreading disinformation & falsehoods regarding its aggression against ?? pic.twitter.com/X5Vb7CTE3c
— EU at the UN – Geneva #MultilateralismMatters (@EU_UNGeneva) March 1, 2022
Поради суспендирањето на летовите, Лавров го откажа патувањето за Женева, каде што денеска требаше да учествува на Конференцијата за разоружување. Сепак, тој се обрати преку видеоврска. Тој рече дека Украина се обидува да набави нуклеарно оружје, што е „реална опасност“ за која е потребен руски одговор.
„Опасностите што режимот на Зеленски денеска ги претставува за соседните земји и општо за меѓународната безбедност значително се зголемија откако властите формирани во Киев почнаа опасни игри, поврзани со плановите да се здобијат со сопствено нуклеарно оружје. Украина сè уште има советски нуклеарни технологии и средства за испорака на такво оружје. Не можеме да не одговориме на оваа реална опасност“,
рече Лавров во видеообраќањето повикувајќи, исто така, Вашингтон да го врати своето нуклеарно оружје.
Како што објави „Ројтерс“, тој го одржа говорот пред малку присутни откако многу дипломати, вклучително и Франција и Британија, излегоа во знак на протест против руската инвазија на Украина. Тие стоеја во круг надвор од салата држејќи украинско знаме додека траеше говорот на Лавров.