Како што наведуваат од ИЈЗ во својот неделен извештај, согласно новиот алгоритам за оздравување, во текот на минатата недела со статус „оздравени“ се стекнале вкупно 11 122 лица во болници или на домашно лекување. Додека, пак, 9 982 лица минатата недела се заразиле со ковид, а регистрирани се и вкупно 1 340 реинфекции со вирусот
Во текот на минатата недела односно во периодот од 31 јануари до 6 февруари, во земјава се регистрирани вкупно 9 982 случаи позитивни на ковид-19, што е за 16,2 отсто помалку во однос на неделата претходно, кога имаше 11 910 позитивни случаи, соопштуваат од Институтот за јавно здравје (ИЈЗ).
Како што соопштуваат од ИЈЗ во својот неделен извештај, минатата недела направени се вкупно 33 421 тестирања за ковид-19, со намалување од 13,2 отсто во однос на минатата недела, а регистрирани се и вкупно 1 340 реинфекции, што е намалување за 14 отсто во однос на претходната недела.
Позитивни случаи на ковид се регистрирани во 35 градови во земјава, најголем дел од заразените, односно повеќе од 50 отсто се од Скопје. Највисоката неделна инциденца, пак, е регистрирана во Кавадарци.
Регистрирани се заболени лица од сите возрасни групи, а најзастапени се лица на возраст од над 60 години. Најмал број на ковид позитивни, пак, е регистриран кај возрасната група од нула до девет години.
Како што наведуваат од ИЈЗ, согласно новиот алгоритам за оздравување во текот на минатата недела со статус „оздравени“ се стекнале вкупно 11 122 лица во хоспитализирани услови или на домашно лекување.
Пријавени се 147 смртни случаи во 24 градови во текот на изминатата недела, што е за 0,7 проценти помалку во однос на минатата недела. Најголем дел од починатите се од Скопје. Во однос на возраста, најголем број од починатите се во возрасна група над 60 години, а регистрирани се починати лица и кај останатите возрасни групи.
Од 17 февруари минатата година, кога започна имунизацијата против ковид во земјава, заклучно со 6 февруари годинава, вакцинирани се вкупно 867 529 лица со барем една доза на вакцина против ковид-19 во државата и во странство. Целосно вакцинирани се вкупно 845 121 лица, а со трета доза се вакцинирани 132 488 лица.