И италијанскиот амбасадор во земјава, Андреа Силвестри, упати апел граѓаните да се вакцинираат потсетувајќи дека Италија беше првата најпогодена земја од коронавирусот, а успеа да се справи со пандемијата благодарение на вакцината
Северна Македонија доби 250 000 дози од вакцината на „Фајзер“ против ковид-19, кои се донација од Италија којашто се спроведува преку Ковакс механизмот и УНИЦЕФ. Првата пратка пристигна вечерва на Институтот за трансфузиологија, а втората ќе пристигне во среда и ова претставува најголемата донација направена од земјава.
Министерот за здравство, Беким Сали, се заблагодари на италијанската влада и ги повика граѓаните да се вакцинираат бидејќи тоа е единствениот начин за заштита порачувајќи им дека вакцините се безбедни, се чуваат на сигурно место и безбедно се транспортираат.
Тој вели дека процентот на вакцинирано население и со прва и со трета доза не е доволен, па уште еднаш апелираше населението да се вакцинира споделувајќи информација дека според првичните информации засега во земјава не починало ниту едно лице кое има коморбидитети, а е вакцинирано со трета доза.
„Не е доволен бројот на граѓаните кои примиле прва доза. И многу е мал бројот на граѓани кои примиле трета доза која сметаме дека е сигурна, безбедна. Според нашите првични анализи кои не се финални зошто сè уште ги преземаме бројките и ги правиме анализите на сите починати до сега, ни дава до знаење дека третата доза е најсигурен штитник досега за сите пациенти кои имаат коморбидитети. Да не се сфатиме погрешно, сè уште нема евидентирано починати лица кои имале трета доза, а имале и коморбидитети. Нека биде ова апел до сите наши граѓани, ги молиме сите кои има коморбидитети што побргу да се обратат до вакциналните пунктови и да се заштитат“,
повика Сали.
И италијанскиот амбасадор во земјава, Андреа Силвестри, упати апел граѓаните да се вакцинираат потсетувајќи дека Италија беше првата најпогодена земја од коронавирусот, а успеа да се справи со пандемијата благодарение на вакцината.
„Оваа акција е дел од нашите стремежи да им помогнеме на пријателските земји да се справат со пандемијата, но во конкретниот случај се работеше за посебното внимание кое го имаме кон Северна Македонија. Оваа акција се придружува на сето она што го прави ЕУ за Република Северна Македонија. Му се придружувам на министерот во апелот да се продолжи со вакцинацијата. Како што знаете Италија беше првата земја која најмногу беше погодена од пандемијата. Благодарение на оваа масовна кампања за вакцинација успеавме да се справиме со пандемијата. Во моментов успеавме да вакцинираме околу 85-90 отсто од населението. Ве повикувам да продолжите со напорите и заложбите да се помогне во справувањето со вирусот“,
повика амбасадорот на Италија.
И Артур Ајвазов од канцеларијата на УНИЦЕФ се приклучи на апелите порачувајќи дека треба да се вакцинираат и децата, како со вакцините против ковид, така и со другите предвидени вакцини.