Владата на седницата во вторникот донесе одлука Решенијата за лицата што треба да бидат во изолација поради ковид да се објавуваат на веб-страницата на Државниот санитарен и здравствен инспекторат и дополнително во „Службен весник“ во најбрз можен рок, но притоа нема да бидат објавувани личните податоци на граѓаните, односно целосно ќе бидат запазени стандардите дефинирани со Законот за заштита на личните податоци
Ова предизвика реакции во јавноста поради можноста од злоупотреба на личните податоци
Комисијата за спречување и заштита од дискриминација (КСЗД) соопшти дека по покренатата постапка од нивна страна, а во врска со одлуката Државниот здравствен и санитарен инспекторат (ДСЗИ) на неговата веб-страница јавно ќе ги објавува имињата, презимињата и адресите на новозаразените со ковид-19, денеска се одржа средба меѓу претставници на двете институции.
На средбата претставниците на ДСЗИ посочиле дека ваква одлука е донесена поради тоа што системот за процесирање и достава на решенијата за изолација е обемен и застарен, и создава многу проблеми во пракса, а ситуацијата станала дополнително комплицирана со новиот зголемен бран на новозаразени и скратувањето на роковите за изолација, соопштија од Комисијата.
Претставниците на ДСЗИ посочиле дека веќе се разгледани најголемиот број на опции за поефикасно доставување на решенијата и дека во соработка со ИТ-компанија дискутиран е нов електронски систем на доставување на решенијата за изолација.
За да се спречи евентуална дискриминација со примена на овој начин на објава и достава на решенијата за изолација, КСЗД ќе ги следи наредните чекори во насока на решавање на овој проблем и доколку предложениот концепт нема да содржи елементи на дискриминација, ќе го поддржи, се вели во соопштението од денешната средба.
Владата на седницата во вторникот донесе одлука Решенијата за лицата кои треба да бидат во изолација поради ковид ќе се објавуваат на веб-страницата на Државниот санитарен и здравствен инспекторат и дополнително во „Службен весник“ во најбрз можен рок, но притоа, нема да бидат објавувани личните податоци на граѓаните, односно целосно ќе бидат запазени стандардите дефинирани со Законот за заштита на личните податоци.
Во соопштението од владината прес- служба се наведува дека причина за ваквата измена е зголемениот број граѓани за кои се определува мерката изолација и поради намалениот број денови за изолација, а со цел брз проток на информациите, намалување на временската разлика меѓу моментот кога е констатирана потребата од изолација, издавањето на решението за изолација и неговото објавување. Исто така, според Владата, со новата методологија се намалуваат можностите за злоупотреба во периодот додека не се објави решението, а со тоа се намалуваат и ризиците од дополнителен број случаи позитивни на ковид-19.
За овој начин на доставување на решенијата, граѓаните ќе бидат претходно известени преку телефонскиот број оставен во установата каде било извршено тестирањето, а ќе постои можност да биде издадена потврда дека е издадена јавна објава за изолација на писмено барање на граѓаните.
Потврда за објавено решение за самоизолација може да биде издадена и за потребите на Основното јавно обвинителство или друг јавен орган со надлежност за увид во решенијата за изолација.
По реакциите во јавноста дека на овој начин се нарушува приватноста и личните податоци, од Владата појаснија дека ќе има веб-платформа од каде ќе се преземаат решенија за изолација, а како ќе се одвива постапката на преземање на документот од Владата велат дека дополнително ќе ја информираат јавноста.
Оттаму уверуваат дека личните податоци на пациентите ќе бидат заштитени односно секој ќе има пристап само до своето решение.
*Поврзана вест: (ВИДЕО) Борба против дискриминацијата со дискриминирачки буџет