Случајот за Рашковски го отвори „360 степени“ откако во март лани објавивме дека Генералниот секретаријат на Владата, додека со него раководеше Рашковски, купил софтвер за сообраќајни прекршоци вреден 81 000 евра, иако ниедна институција ниту го барала ниту го користи, како и дека пред да го купи како генерален секретар на Владата, тој лично развил таков софтвер за сообраќајни казни и го патентирал
Судскиот процес против поранешниот генерален секретар Драги Рашковски ќе започне на 25 јануари. Терминот е закажан откако предметот според АКМИС бил распределен кај судијката Фанка Јанчулева-Михаиловска од Основниот кривичен суд во Скопје.
Распределбата и закажувањето на стартот на судскиот процес следува откако на два дена пред Нова година Основниот кривичен суд го прифати обвинителниот акт против Рашковски и уште шест лица поврзан со нелегална набавка на софтвер и перење пари, кој Обвинителството за гонење организиран криминал и корупција го поднесе на 8 октомври 2021.
Судијката кај која се падна предметот во октомври беше распределена од Одделот за кривично полнолетни во Одделението за организиран криминал. Прераспределбата, како што беше соопштено тогаш, ја направил претседателот на Кривичниот суд, Иван Џолев, врз основа на анализа во бројот на активни случаи и бројот на судии во одделите во судот.
Со доаѓањето во Одделението за организиран криминал, судијата Јанчулева-Михаиловска ги презеде и предметите во кои дотогаш постапуваше Владимир Туфегџиќ, кој на негово барање беше разрешен од судиската функција. Меѓу попознатите предмети што таа ги презеде е и случајот „Шпански скали“ за продажбата на државно земјиште во строгиот центар на Скопје против 11 лица меѓу кои и ексминистерот Миле Јанакиески.
За што се гони Рашковски
Случајот за Рашковски го отвори „360 степени“ откако во март лани објавивме дека Генералниот секретаријат на Владата, додека со него раководеше Рашковски, купил софтвер за сообраќајни прекршоци вреден 81 000 евра, иако ниедна институција ниту го барала ниту го користи, како и дека пред да го купи како генерален секретар на Владата, тој лично развил таков софтвер за сообраќајни казни и го патентирал.
Рашковски тврдеше дека софтверот треба да биде дел од т.н. „Сејф сити“, но единствената институција со право да казнува, Министерството за внатрешни работи, брзо ја урна тезата на Рашковски со ставот дека ниту барале ниту планираат да го користат софтверот за кој никој не ги прашал.
Во случајот за кој е поднесен обвинителниот акт се споени два предмети поврзани со спорните набавки на два софтвери – едниот за автоматско казнување за сообраќајни прекршоци и еден за биометриска идентификација. Рашковски е првообвинет и му се става на товар дека во периодот од јуни 2017 до февруари 2021 како генерален секретар извршил продолжено кривично дело злоупотреба на службената положба и кривично дело перење пари. Второ и третообвинетиот, како негови надворешни соработници, според Обвинителството, со умисла му помагале во повеќекратното извршување на кривичното дело злоупотребата на службената положба, четвртообвинетиот – сопственик и управител на фирма, пак, му помагал во една јавна набавка. Исто како и четвртообвинетиот, и другите обвинети се гонат за по едно кривично дело злоупотреба на службената положба и овластувања.
Обвинението опфаќа четири набавки, и тоа на: систем за биометриска идентификација; софтвер за определување на просечна брзина на возила во сообраќајот и изрекување на казни; ANPR-камери за препознавање регистарски таблички за возила; и на метални кабини за потребите на системот на биометриска идентификација и систем за автоматско препознавање на регистарски таблички.