Мандатарот не сакаше да коментира и околу конкретни имиња на министри во новата влада за кои изминатиот период се шпекулира, како што е актуелниот министер за правда Бојан Маричиќ, за кого се пишуваше дека ќе биде вицепремиер за евроинтеграции на местото на Никола Димитров. Новата влада, како што најави, ќе биде предложена околу 10-11 јануари
Новиот мандатар, Димитар Ковачевски, во интервју за Канал 5 ТВ рече дека не очекува дека ќе има голема промена во поделбата на министерствата меѓу коалициските партнери од онаа што е сега. Како што рече, промени очекува да има само во еден или два ресори со оглед дека министерствата веќе се поделени и има владина програма која се реализира. Новата влада само ќе ја надополни таа програма.
„Владата го има добиено легитимитетот на изборите во 2020 година, таа има владина програма и сега имаме нов партнер во владата, Алтернатива. Ресорите се поделени согласно со преземените одговорности во Владата. Јас не очекувам да има поголеми проблеми во ресорите, од причина што веќе има владина програма којашто се реализира, меѓутоа која ќе биде надополнета и ќе биде претставена заедно со новата влада во Собранието кога ќе дојде на дневен ред за гласање. Затоа би кажал дека не би очекувал да има големи промени во ресорите, можеби само еден-два ресори коишто би биле финално распределени откако ќе завршат разговорите со сите коалициски партнери“,
одговори Ковачевски на прашањето дали се завршени преговорите со ДУИ со оглед дека во јавноста има информации дека ќе има „претумбации“ во ресорите.
Тој не сакаше да коментира и околу конкретни имиња на министри во новата влада за кои изминатиот период се шпекулира, како што е актуелниот министер за правда Бојан Маричиќ, за кого се пишуваше дека ќе биде вицепремиер за евроинтеграции на местото на Никола Димитров.
„Не би сакал да зборувам за персонални решенија затоа што пред да се извршат какви било разговори не е умешно да се разговара за кадровски решенија. Веројатно името на министерот за правда Бојан Маричиќ се споменува во контекст на тоа што тој остана секретар за меѓународна соработка на СДСМ и што ме придружува на средбите со дипломатскиот кор. Јас би се осврнал повеќе на принципот кој ќе го користам при изборот на соодветните кадровски решенија за министри. Тие ќе треба да ги исполнуваат прво професионалните, стручните и политичките критериуми за водење на одреден ресор. Секако ќе биде земено предвид искуството за водење на тие ресори и перформансите кои ги имале изминатиот период“,
рече Ковачевски.
Тој најави дека новата влада ќе ја предложи пред истекот на рокот од 20 дена кој започна да тече денеска, односно ќе го достави предлогот за владиниот состав околу 11-11 јануари. Новата влада рече тој, ќе биде посветена на економските прашања, како и на внатрешно-политичките прашања за да се адресираат најгорливите проблеми во моментов како што се пандемијата, енергетската криза, зајакнување на животниот стандард, реализација на капитални инвестиции, финансиска поддршка за сите граѓаните и др.