-Нашата земја е мала и не смееме да дозволиме политички поделби и бескрајни расправии. Граѓаните бараат да видат разлика, да видат напредок, а со тоа и да ја вратат довербата дека можеме и умееме како општество, вели мандатарот Ковачевски
Претседателот Стево Пендаровски денеска му го врачи мандатот за состав на Влада на новиот лидер на СДСМ Димитар Ковачевски.
„Врз основа на член 84 став 1 од Уставот на Република Северна Македонија, и известувањето за предлогот за мандатар доставено од СДСМ, а поддржано од политичките партии во состав на коалицијата, кои заедно го имаат мнозинството пропишано со Уставот во Собранието, за мандатор за состав на владата го определувам господинот Димитар Ковачевски, претседател на СДСМ“,
кажа Пендаровски при врачувањето на мандатот.
Согласно Уставот, мандаторот во рок од 20 дена од денот на доверувањето на мандатот, на Собранието му поднесува програма и го предлага составот на Владата. Собранието ја избира Владата со мнозинство гласови од вкупниот број пратеници.
Ковачевски по доделувањето на мандатот кажа дека од денеска започнува со формирање на тим кој треба да одговори на сите предизвици. Вели дека живееме во турбулентни времиња, времиња на кризи и неизвесности, како и долгогодишни проблеми кои го попречуваат напредокот на државата и остварувањето на стратешките цели.
„Новата Влада ќе има јасна цел, обезбедување сигурност, подобар живот и светла иднина за нашите граѓани. Затоа е потребно ефикасно, чесно и одговорно владеење, што ќе биде одлика на тимот кој јас како мандатар ќе го составам. Моја лична заложба е да ја вратиме довербата на граѓаните во политиката и институциите. Мора сите заедно да се стремиме кон независни институции и правично општество, ако сакаме да ни веруваат оние на кои им служиме“,
кажа Ковачевски.
Мандатарот вели дека новата Влада јасно ќе ги дефинира приоритетите за работа, а силен фокус ќе стави на економскиот развој на државата. Посочи дека новата Влада ќе биде одговорна и да донесе нов квалитет во јавната комуникација и соработка со сите чинители во општеството.
„Нашата земја е мала и не смееме да дозволиме политички поделби и бескрајни расправии. Тие прават голема штета на развојот и реалиацијата на проекти и реформи, кои се потребни за подобар живот на сите. Мораме да ги надминеме разликите, да се обединиме во приоритетите и брзо да напредуваме. Граѓаните бараат да видат разлика, да видат напредок, а со тоа и да ја вратат довербата дека можеме и умееме како општество“,
кажа Ковачевски.
Непосредно пред доделување на мандатот, лидерот на ВМРО-ДПМНЕ Христијан Мицкоски, изјави дека очекува Ковачевски да ги продолжи политиките на Зоран Заев.
„Имав прилика да слушнам едно интервју на Ковачевски, стерилно, буквално не можам да препознам некоја политичка, лидерска реченица која ќе можам да ја коментирам. Затоа очекувам само продолжување на политиките и ништо друго“,
рече Мицкоски.