Претседателот на Собранието очекува новата влада да биде изгласана до 17 јануари. Ваквите проценки, Талат Џафери, ги темели врз уставните рокови, политичките консултации кои се во тек, како и најавата дека шефот на државата, Пендаровски, утре ќе му го додели мандатот за состав на владата на новиот лидер на СДСМ, Димитар Ковачевски.
„Откако претседателот ќе му го додели мандатот на Ковачевски, Собранието треба да биде известено и да почнат да течат роковите. Максимумот е 20 дена, но јас не очекувам мандадарот да го искористи до крај овој рок. Сметам дека до 10 или 11 јануари во Собранието би стигнал предлог-составот на новата влада, како и програмата. По консулатациите со пратеничките групи, седницата за избор на нова влада би можела да се закаже за 15 јануари, а до крајот на денот на 16 јануари таа и да се избере“,
изјави денеска Џафери на годишната прес-конференција на која ја сумираше работата на парламентот.
Според Џафери, реално е да се очекува утрото на 17 јануари новите и ново-старите министри да бидат на работните места.
На синоќешната седница на Централниот одбор на СДСМ беше решено новиот претседател на СДСМ, Димитар Ковачевски, да биде мандатар за состав на новата влада.
„Првата задача која ја има новото раководство е да состави нова влада и силно да се посветиме на спроведување на владините програми и политики. Јас сум оптимист дека новата влада предводена од СДСМ ќе ја избереме во средината на наредниот месец, до 18 јануари. Пред новата влада ги имаме менаџирањето на енергетската криза, економската криза предизвикана од пандемијата, како и продолжување на евроинтеграцискиот процес и преговорите со соседна Бугарија. Верувам дека можеме сите овие предизвици да ги надминеме со стабилна влада со мандат до 2024 година“,
изјави Ковачевски.
Ковачевски избран за мандатар на идната Влада