Во списокот повеќе ги нема имињата поврзани со поранешна Југославија, но и на првоборци и учесници во НОВ. Најмногу од новите имиња се на личности и настани од албанската историја и култура и на Албанци од Дебар
Дебарскиот градоначалник, Хекуран Дука, на својот фејсбук профил соопшти оти жителите на Дебар конечно имаат причина за славење поради долгопосакуваното преименување на дел од улиците во градот, што е веќе одобрено од Владата.
„Владата го одобри предлог-списокот со имиња на улици во градот Дебар, доставен од општината за одобрување. Конечно имаме причина да се радуваме на оваа долгоочекувана и посакувана добра вест. Честитки за сите дебрани и со среќа. На пример, улицата ’22 декември’ (Денот на Армијата во СФРЈ н.з.) сега ќе го носи името „Јосиф Багери“ итн.“,
напиша Дука на својот фејсбук профил.
Предлог-списокот, што Советот на Општина Дебар го усвои на 29 април годинава со запазување на принципот на гласање според Бадентер, во себе предвидува менување на имињата на дел од улиците, плоштадите и други инфраструктурни објекти во Општина Дебар.
Најголем број од имињата се на личности и настани од албанската историја, култура и Албанци од Дебар. Во списокот повеќе ги нема имињата поврзани со поранешна Југославиј,а но и на првоборци и учесници во Народноослободителната војна. Остануваат досегашните имиња на улиците „Илинден“, „Гоце Делчев“, „Никола Карев“, на дебарските народни херои „Ибе Паликуќа“ и „Лиман Каба“, како и првоборци „Павле Џиковски“ и „Зија Мерсоски“.
Плоштадите „Скендербег“ и „Илирија“ ги задржуваат досегашните имиња, додека третиот плоштад ќе се именува „Елез Исуфи“. „Мостот Рајчица“ се преименува во „Дебарски Мост“ додека „Мелнички Мост“ ќе се преименува во „Мостот на Радика“. Нови имиња ќе добијат населбите Венец 1 која ќе се вика „Уранику“, Венец 2 ќе го добие името „Пенестија“, а населбата Депласт ќе се преименува во „Мост Селам“.
Инцијатива за промена на имињата за првпат беше поведена од Советот на општината 1996 година, а потоа и во 2010 година. Но, овие иницијативи не беа реализирани до крај.