Во Агенцијата за лекови има над 130 пријави за несакани реакции кои се во границите на она што е пропишаното во упатството
Се прави комплетна обработка за да се докаже дали несаканата реакција, нека е тоа и смртен случај, е навистина поврзана со употребата на вакцините против ковид-19. Двете пријави добиени во април и во септември, а се од страна на лекари, се за 85-годишник и за 53-годишник, но сè уште не е докажана поврзаност со употребата на вакцините, истакна раководителката на сектор во Агенцијата за лекови и медицински средства (МАЛМЕД), Мерјем Хаџихамза на денешната онлајн средба со новинарите на која учествуваше и в.д. директорот на МАЛМЕД, Љирим Шабани.
Таа појасни дека пријавите освен во Центарот за мониторинг Упсала во Шведска, испратени се и во Институтот за јавно здравје, каде што се прави таа натамошна обработка.
Шабани и Хаџихамза посочија дека станува збор за сомнежи и неофицијални податоци, и нагласија дека ефектите од вакцинацијата се далеку, далеку поголеми.
„Кога еден лек, во случајов вакцина, ќе се употреби, ако се пријави некое несакано дејство, тоа не значи дека е последична реакција од примената на вакцината. Пријавите што доаѓаат кај нив се сомнежи за несакана реакција. Постојат голем број параметри што треба да се испитуваат, какво било медицинското досие на пациентот, претходно од што боледувал, какви лекарства примал. За еден од пациентите гледав дека имал многу коморбидитети и лично се сомневам дека има поврзаност со употребата на вакцината, но ова е нерелевантно затоа што тоа треба да го кажат луѓето кои за тоа имаат компетенции“,
истакна Хаџихамза.
Во врска со пријавување несакани реакции од вакцините, Шабани рече дека за вакцините од лекари досега добиле 133 пријави, од фармацевти – 88, а од други здравствени работници – 10.
„Во неколку наврати имавме пријави и од граѓани. Сите тие се собираат, обработуваат во смисла на нивна категоризација. Како држава имаме склучено договор со Центарот за мониторинг Упсала во Шведска, Центарот за несакани ефекти на ниво на СЗО, каде што се собираат од сите земји несаканите ефекти и се дават препораки и следење на лекот. Значи кај нас се собираат, ги споделуваме со Упсала и ги даваме за натамошна обработка до Институтот за јавно здравје за да се испитуваат“,
истакна Шабани.
Досега, потенцира тој, пријавените несакани ефекти од сите вакцини се во рамки на предвидливите кои се наведени во нивното упатство, без оглед дали се работи за главоболка, гадење, вртоглавица, болка во екстремитети, рамо, на местото на апликација.
„Исклучок од ова може да го спомнам случајот со миокардит од вакцината на „Фајзер“ која се утврди откако таа се пушти, која не беше предвидена од производителот, тоа се утврди од Европската агенција на лекови, тие направија соодветна варијација и ние дадовме варијација дека е можен несакан ефект очекуван во ретки случаи. Процентот на несаканите ефекти во однос на аплицираните вакцини е многу мал“,
додаде Шабани.
На новинарско прашање колку решенија издала Агенцијата за уништување вакцини и за кои производители досега се издадени решенија, рече дека досега се издадени одобренија за уништување на вакцини од производителите „Фајзер“, „Астра Зенека“ и „Синофарм“ на неколку наврати.