Од компанијата најавуваат дека до средината на наредната година, пак, поголемиот дел од населението во урбаните средини ќе има можност да користи 5Г услуги
Телекомуникациската компанија „Телеком“ денеска соопшти дека во тек се активностите за поставување на 5Г-мрежа на целата територија на државата. Како што информираат оттаму, во тек е интензивна работа на терен заедно со партнерот „Ериксон“ за замена на постојната технологија со нова, која ќе овозможи 5Г-услуги а со тоа подобро корисничко искуство и олеснување на животот во сите сфери.
„Технологијата од петтата генерација, заедно со новите технологии: интернет на нештата, паметни сензори и вештачка интелигенција, ќе овозможат рационално и ефикасно да ги користиме природните ресурси и енергијата, да го зачуваме биодиверзитетот, да го зголемиме производството на храна, да ја намалиме емисијата на штетни гасови и друго. Овие технологии ќе бидат најсилната алатка во борбата против климатските промени.“
најавуваат од телекомуникациската компанија.
Од „Телеком“ најавуваат дека до крајот на годината дваесет отсто од населението ќе биде покриено со опрема од најновата петта генерација (5Г), а до средината на наредната година поголемиот дел од населението во урбаните средини ќе има можност да користи 5Г-услуги.
„За модернизација на мрежата и овозможување 5Г, компанијата инвестира над 45 милиони евра за наредните четири години.“
посочуваат од „Телеком“.
Од „Телеком“ најавуваат дека ќе понудат 5Г-услуги веднаш по добивањето на одобренијата за користење радиофреквенции од АЕК, што се очекува во првото тримесечје од 2022 година.
Агенцијата за електронски комуникации (АЕК), пак, вчера објави тендер за доделување одобренија за користење радиофрекфенции за петтата мобилна генерација, преку јавно наддавање. Рокот за доставување на понудите е 35 дена.