Од АНБ велат дека постапувајќи по своите изворни надлежности, меѓу кои и спротивставување на разузнавачки активности на други држави на територијата на Северна Македонија, стигнале до сознанија дека конкретното лице против кое во тој момент се водеше истражна постапка (Јордан Камчев, н.з.), планира бегство. Во документот што протече во јавноста се наведува дека Камчев, со своја пријателка, престојувал во комплексот „Аурора“ кај Берово во февруари годинава, каде оставарил средба со припадник на странска служба за безбедност, на која било разговарано за реализација на намерата за негово бегство во Бугарија
Од Агенцијата за национална безбедност (АНБ) не откриваат дали Јордан Камчев или припадник на странска разузнавачка служба бил цел на следење, активност од која произлегла информацијата по која бизнисменот заврши во притвор. Извор од АНБ денеска ги повтори наводите од соопштението што Агенцијата го издаде на 16 март 2021 година дека се што било преземено било во рамки на законските надлежности на оваа институција.
На 14 март 2021 година, Камчев првично беше приведен од МВР, а потоа на предлог на јавното обвинителство, врз основа на сознанија на АНБ дека се подготвува за бегство, судот му одреди притвор, мерка што се продолжува до денес.
Притоа, изворот од АНБ денеска инсистираше на терминолошка прецизност, наведувајќи дека не станува збор за „службена белешка“ – термин што се користи во јавноста за документот што беше основа за притворањето на Камчев, туку за „информација“.
Од АНБ уште велат дека постапувајќи по трите свои изворни надлежности: 1) спротивставување на разузнавачки активности на други држави на територијата на Северна Македонија; 2) спротивставување на тероризам и насилен екстремизам во земјава; 3) собирање релевантни информации за евентуално загрозување на виталните економски интереси на државава – стигнале до сознанија дека конкретното лице против кое во тој момент се водеше истражна постапка, планира бегство. За тоа подготвиле информација и ја доставиле до државното раководство и јавното обвинителство.
„И парламентраниот надзор се увери дека се е законски и документирано“
Во класифицираниот документ (информацијата) на АНБ што протече во јавноста беа наведени сознанија дека Камчев, со своја пријателка, престојувал во комплексот „Аурора“ кај Берово во февруари годинава, каде оставарил средба со припадник на странска служба за безбедност. Според наводите во информацијата, на средбата било разговарано за реализација на намерата за негово бегство во Република Бугарија. Информацијата беше предмет на критика во јавноста со оценки дека е паушална и површна, без да понуди конкретни докази и аргументи за наводите.
Изворот од АНБ денеска ги отфрли критиките, велејќи дека сознанијата наведени во информацијата биле целосно документирани. На прашањето дали државното раководство и јавното обвинителство имале увид во доказите и аргументите во прилог на документот, изворот од АНБ одговори потврдно, додавајќи дека увид во класифицирани информации може да имаат функционери и службеници со соодветно ниво на безбедносен сертификат.
Во прилог на тврдењето дека се било професионално сработено и дека информацијата била целосно документирана, изворот од АНБ го наведе и исходот од надзорната посета на собраниската Комисија за надзор над работата на безбедносно-разузнавачките служби, остварена во април годинава. Документот бил една од темите за разговор, а состанокот со Комисијата со која раководи пратеникот од опозициската ГРОМ, Љупчо Пренџов, завршил без неодговорени прашања, вели изворот од АНБ.
Според неговите наводи, за протекувањето на класифицираниот документ во јавноста се води постапка во јавното обвинителство која добро напредувала. Информацијата не протече од АНБ, тврди истиот извор.