За регистарските таблички со новата ознака НМК, министерот за внатрешни работи рече дека тие веќе се издаваат согласно со уставните амандмани и Уставниот закон
Издавањето на новите лични карти се одвива нормално и досега се издадени околу 13 000, изјави министерот за внатрешни работи Оливер Спасовски.
„Издавањето тече нормално, испечатени се повеќе од 13 илјади досега, очекуваме најмногу две недели да трае целиот процес на печатење на оние што практично чекаа на одобрување и на печатење. Секако, доколку успееме да го забрзаме тој процес и тоа ќе го направиме. Ние сме во постојан ангажман, така што ќе направиме се што е можно побрзо да ги добијат личните карти и оние лица кои чекаа на одобрување, меѓутоа секако и редовно да тече издавањето на новите документи“,
рече Спасовски во врска со надминувањето на проблемот што го имаа околу 40 000 граѓани со истечени лични карти, поради блокадата на законските измени во Собранието.
За издавањето регистарски таблички со новата ознака НМК, министерот за внатрешни работи рече дека тие веќе се издаваат согласно уставните амандмани и Уставниот закон.
„Ние издаваме таблички што се со новата ознака, така како што е предвидено, и тие ќе бидат заменувани кога ќе дојде моментот. Значи, имаме период најмногу за пет години за да биде извршена целосната замена“,
нагласи Спасовски.