Министерот Спасовски рече дека во однос на статусот, тие ќе имаат привремен престој од 90 дена, а еден дел од процедурата за издавање на дозвола за привремен престој е и правење безбедносна проверка преку Агенцијата за национална безбедност (АНБ)
Досега бројката на авганистански цивили за кои е побарано згрижување кај нас е 750 лица, соопшти денеска министерот за надворешни работи Бујар Османи, објаснувајќи дека се работи за бројка која секогаш е во рамките на можностите коишто Владата ги проценува.
И тој повтори дека се работи за привремено згрижување тие луѓе се додека не се процесуираат нивните документи за нивната конечна дестинација.
„Првите бројки со коишто комунициравме беа барања од страна на меѓународни организации, наши партнери за привремено згрижување на авганистански цивили, жени, деца, луѓе коишто работеа за нашата мисија 20 години во Авганистан. Како се зголемува бројот на барања, групата во рамки на Владата прави проценка во која што се имаат предвид сите аспекти и логистички, и безбедносни и здравствени и сите можни аспекти за коишто имаат надлежност институциите коишто се присутни во таа група и врз основа на тоа ги потврдуваме или не ги потврдуваме барањата“,
рече Османи одговарајќи на новинарско прашање на денешната прес-конференција во МНР со министерот за внатрешни работи Оливер Спасовски.
Тој посочи дека досега комуникацијата по однос на барањата за згрижување одеше преку нашите партнери, нашите сојузници и невладините меѓународни организации коишто работеле заедно со нашите партнери и заедно со нашата војска во текот на 20 години ангажман во Авганистан. Уште од минатата недела нашата земја е спремна тие 750 да ги прифати. Сепак, Османи вели дека бројката постојано се менува.
„Имаше една група, на пример, која требаше да дојде во државата која замина за Катар, меѓутоа подоцна сменија дестинација, и наместо тука, заминаа во друга држава“,
рече шефот на дипломатијата.
Министерот Спасовски само додаде дека МВР ја гарантира безбедноста на нашите граѓани и дека цивилите кои треба да пристигнат не се радикали или лица кои можат да предизвикуваат какви било проблеми од овој аспект.
Во однос на статусот тој повтори дека тие ќе имаат привремен престој од 90 дена, а еден дел од процедурата за издавање на дозвола за привремен престој е и правење безбедносна проверка преку Агенцијата за национална безбедност (АНБ).
И премиерот Зоран Заев денеска одговорајќи на новинарско прашање на оваа тема, рече дека вкупно 74 000 денари ќе ја чини државата згрижувањето на овие лица од Авганистан, но потенцира дека не се знае точно колку од нив ќе пристигнат во земјава зашто бројката постојано се менува.