Годинава ќе изостане традиционалното садење дрвце во Паркот на поезијата во чест на лауреатот, поради неможноста да присуствува добитничката на Златен Венец, британската поетеса Керол Ен Дафи која ќе има видеообраќање и поетско читање
Под посебни протоколи поради ковид-19 и без дел од традиционалните содржини денеска во Струга почнува јубилејното 60. издание на Меѓународниот поетски фестивал Струшки вечери на поезијата.
Официјалното отворање ќе биде вечерва на летната тераса во хотел „Дрим“, а претходно на летната сцена во центарот за култура „Браќа Миладиновци“ ќе биде отворена изложба „60 години Струшки вечери на поезијата“. Годинава ќе изостане традиционалното садење дрвце во Паркот на поезијата во чест на лауреатот, поради неможноста да присуствува добитничката на Златен Венец, британската поетеса Керол Ен Дафи. Според најавите на Фестивалот, лауреатот, ќе има видеообраќање и поетско читање.
Јубилејното фестивалско издание ќе се одржува под мотото „Извишени сведоштва, возвишени стихови“, што го потенцира значењето на Паркот на поезијата и симболиката на засадување на дрво од страна на лауреатите секоја година, како чин со кој се одбележува растежот на фестивалот.
Најголем дел од поетските читања и портретите на фестивалот ќе се одржуваат на летната тераса во хотел „Дрим“ и на летната сцена во Центарот за култура, а најавено е присуство на 30-тина поети од земјава и светот.
Манифестацијата завршува на 30 август, в недела со меѓународното поетско читање Мостови” и врачување на наградите, „Браќа Миладиновци” и „Мостови на Струга”, на летната тераса во хотел „Дрим“.
Физичкото присуство на публиката ќе биде ограничено поради капацитетот на просторот и поради протоколите за заштита, со задолжителна потврда за целосна вакцинација или примена најмалку прва доза вакцина или сертификат/потврда за прележан ковид – 19 во последните 45 дена, сметајќи од денот на оздравувањето, за лица над 18-годишна возраст.
Програмата ќе се пренесува во живо на официјалниот јутјуб-канал на Струшките вечери на поезијата.