По објавите дека кај семејство од Врапчиште пристигнало тело на непознат маж наместо нивната почината мајка, Министерство за здравство го појаснува протоколот за ковид-пациенти кои починале во болнички услови
Телата на ковид-пациентите кои починале во болнички услови не ги предаваат од болниците до семејствата, туку според протоколите за заштита од ковид-19 веднаш се повикува Јавно комунално претпријатие на општината или Бутел-погребен сервис АД Скопје за Град Скопје кои понатаму го доставуваат телото до семејството и го организираат погребот.
Ова го појаснува Министерството за здравство по објавите во медиумите дека кај семејство од Врапчиште по грешка притигнало тело на починат маж наместо нивната почината мајка.
Од семејството за ТВ21 изјавиле дека откако го прифатиле телото, забележале дека наместо нивната мајка во ковчегот се наоѓа тело на непознат маж, па се упатиле кон Инфективната клиника во Скопје, каде починала жената.
„По повеќечасовно барање, телото било конечно пронајдено во Гостивар, каде по грешка било испратено од болницата“,
објави телевизијата.
Од Министерството за здравство велат дека ниту една здравствена установа во државата, ниту Клиниката за инфективни и фебрилни состојби од Скопје не направила таква грешка.
„Сите болници и ковид-центри во целост го почитуваат протоколот за постапување со тела на починати лица во болнички услови сомнителни или потврдени на ковид-19. По настапувањето на смртта и подготовка на телото согласно протоколите за заштита од ковид-19, веднаш се повикува Јавно комунално претпријатие на општината или Бутел-погребен сервис АД Скопје за Град Скопје на кои им се предава телото. Погребалните претпријатија, а не болниците, го доставуваат телото на семејството и го организираат погребот“,
велат од Министерството за здравство.