Комората денеска излезе со став за ширењето дезинформации и антиваксерски ставови во јавноста и од лица кои се од здравствената фела
Вакцинацијата е најефикасното решение за заштита од вирусот, која значително ги намалува шансите за да настане инфекција како и компликации од болеста, а научните докази ги потврдуваат овие сознанија, и затоа не треба да постои дилема, туку секој кој нема апсолутни контраиндикации верификувани од стручно лице поврзани со вакцината треба да се имунизира што поскоро, бидејќи така ќе се заштити себеси и своите блиски.
Ова е дел од ставот на Лекарската комора, кој го најави министерот за здравство Венко Филипче пред неколку дена, а се однесува на ширењето дезинформации и антиваксерски ставови во јавноста и од лица кои се од здравствената фела.
Од Комората, исто така, ја потенцираме и неопходноста од почитување на мерките за заштита, како носење заштитна маска, обезбедување на социјална дистанца и избегнување на собири во затворен простор каде постои близок контакт и за тоа ги повикува надлежните институции, стручните комисии и лекарските здруженија во чија надлежност е спроведувањето на континуираната медицинска едукација, а чија специјалност е од областите тесно поврзани со третман на заразните заболувања и спречување на нивното ширење, во услови на непостоење на национални протоколи, да споделат со јавноста стручни ставови за сите отворени прашања и дилеми, за да можат граѓаните своите заклучоци и ставови да градат на точни факти, а не на дезинформации.
„Непостоењето на вакви ставови создава простор за слободни толкувања од нерелевантни извори кои нанесуваат огромна штета на процесот на вакцинација, а со тоа и на напорите да се стави под контрола епидемијата“,
велат од Лекарската комора во денешното соопштение.
Од оваа институција потсетуваат и дека секој здравствен работник има значајна улога во создавањето на јавното мислење и преку јавното споделување на лични ставови и мислења влијае на градењето на ставовите и мислењата на другите луѓе, па затоа укажуваат дека здравствените работници треба да споделуваат ставови кои се базираат на научно докажани факти и да се воздржуваат од промоција и споделување на шпекулации и непроверени сознанија.
„Секогаш, а особено во услови на пандемија е важно здравствените професионалци во своите активности да се водат од Етичкиот кодекс, Законот за здравствена заштита и медицината базирана на докази, дистанцирајќи се било какво политичко или некој вид на друго влијание“,
се вели во соопштението.
Во однос на личните ставови кои ги споделуваат доктори, а кои се насочени кон ширење на псевдонаука и невистини за ефектите од вакцинацијата, ефектот од почитување на мерките за заштита и опасноста од вирусот, Лекарската комора, укажува дека согласно своите надлежности, може да постапува по добиена пријава и да ги утврдува фактите во секој конкретен случај во комуникација со сите засегнати страни, надлежните институции и комисии и стручните здруженија.
Затоа, од Лекарската комора охрабруваат ваквите случаи да се пријавуваат, за да може по нив да постапува.