Владата донесе одлука да ги ослободи од трошоци за визи сите граѓани од Авганистан кои ќе пристигнат во земјата, а трошоците за нивното сместување во неколку хотели и мотели ќе бидат покриени од меѓународните организации и од САД, сѐ до нивното заминување кон САД или до трети земји
Во овој момент Владата има преземено обврска за прифаќање на 450 граѓани од локално населените од Авганистан и тоа: Вработени и жени и деца од семејства на вработени во хуманитарните и миротворните мисии, активисти од организациите за човекови права, новинари, преведувачи, студенти, стипендисти, како и граѓани кои изминатите 20 години беа поддршка на НАТО – сојузничките сили во Авганистан, вклучително и на македонската армија, информираат од Владата.
Најголем дел од овие 450 лица, кои се очекува да пристигнат до крајот на неделава, зависно од околностите на аеродромот во Кабул, се координирани и организирани од американската невладина организација Национален демократски институт (НДИ).
Како што се наведува, Владата продолжува со интензивна координација со сојузничките НАТО сили, со амбасадата на САД во земјава и со меѓународните организации, во рамки на меѓународната спасувачка и хуманитарна мисија за прифаќање и спасување на авганистанското цивилно и миротворно население.
Владата донесе одлука да ги ослободи од трошоци за издавање визи сите граѓани од Авганистан кои ќе пристигнат во земјата, а трошоците за нивното сместување во неколку хотели и мотели во земјава ќе бидат во целост покриени од меѓународните организации и од САД, сѐ до нивното заминување кон САД или до трети земји, како нивна крајна дестинација.
Министерството за внатрешни работи и Агенцијата за национална безбедност, как што соопштуваат од Владата, добиле задолжение, на брз и ефикасен начин, да ги завршуваат сите оперативни, безбедносни и административни обврски за прифаќањето на граѓаните од Авганистан и за нивно спроведување до хотелските капацитети во кои ќе бидат сместени.
Владата апелира за внимателно, одговорно и точно информирање во врска со меѓународната хуманитарна мисија за која, како што се наведува, Северна Македонија презема иницијатива за вклучување и помагање. Како што се наведува во владиното соопштение, никој нема право да ги плаши граѓаните со неточни, опасни и искривени информации, како оние дека наводно земјава ќе ја населеле талибанци – екстремисти.
„Граѓаните од Авганистан ќе пристигнат со прецизно организирани авионски летови, истите се вработени или членови на семејства на вработени во локални и меѓународни демократски мисии и воопшто не се нелегални мигранти. Тие нема да бидат сместени ниту во прифатниот центар во Гази Баба, ниту во новите превентивни капацитети во Бардовци. На Северна Македонија не и се случува никаква мигрантска криза. Напротив, Северна Македонија е дел од голема светска хуманитарна акција за спасување на авганистанско мирољубиво население кое е под опасност од екстремистичките талибански структури. Во исто време, македонските граѓани кои беа регистрирани на аеродромот во Кабул се качени на воените летови и трансферирани во Доха (Катар) и Абу Даби (ОАЕ). Сите наши граѓани се на безбедно, а дипломатската мрежа на Министерството за надворешни работи во овие земји е во директен контакт и тие наскоро продолжуваат кон Скопје“,
соопштија од Владата.
Според последните информации, 14 наши граѓани сѐ уште се наоѓаат во НАТО базата во Кабул и, согласно со распоредот за евакуација, дел од нив се очекува до утре да бидат безбедно транспортирани. Тројца остануваат во НАТО – базата, согласно со нивниот распоред на обврски.