Тој период е за да поминат неопходните 30 дена по оздравувањето и петнаесетина дена да се организира вакцинацијата, вели министерот Филипче
Освен вакцинираните, во угостителските објекти и на настаните на отворено ќе им биде дозволен влез и на лицата кои прележале ковид-19, но само во првите 45 дена по болеста, објави денеска министерот за здравство Венко Филипче, при посета на Охрид.
Овие лица, како што изјави Филипче, е доволно е да поседуваат медицинска потврда дека биле заболени од ковид -19 во рок не подолг од 45 дена.
„Тој период е за да поминат неопходните 30 дена по оздравувањето и петнаесетина дена да се организира вакцинацијата. Потоа, и за овие граѓани ќе важи дека за влез во објекти треба да приложат серитификат за вакцинација, односно потврда за примена барем прва доза вакцина“,
рече Филипче.
Министерот нагласи дека новите рестриктивни мерки кои треба да стартуваат од понеделник се во насока на зашита на јавното здравје.
„Единствено решение е да се зголеми опфатот со вакцинација. Ако граѓаните имаат дилема сакам да ги охрабрам да одат да се вакцинираат. Тоа е начинот да постигнеме колективен имунитет, да имаме нормален живот, да работиме, да бидеме продуктивни и да ги вратиме назад нашите животи. Доказ за тоа е дека популацијата на вакцинирани граѓани, заболува во исклучително мал процент. Верувам дека сите сме свесни, дека граѓаните се свесни оти се работи за мерки во насока на заштита на здравјето. Такви мерки се воведени во сите развиени земји во Европа и во светот. Во принцип, за сите важи потребата од приложување сертификат за вакцинација, единствено што е воведено како забрана е огранизирање свадби и веселби во затворен простор, од причина што на такви прослави тешко се спроведуват и запазуваат протоколите за заштита“,
рече Филипче.
За предвиденото воведување редарски служби во угостителските објекти, Филипче рече дека тоа е во насока на заштита на самите угостители. Нагласи дека при воведувањето на мерките е разговарано со сите субјекти и додаде дека е отворена опцијата за дополнителни консултации за какви било потешкотии или предизвици што би се јавиле при спроведувањерто на новите протоколи.