Секојдневното зголемување на бројот на хоспитализирани и заразени е основа да се смета дека Тетовскиот Регионот веќе е во четвртиот бран на коронавирусот, според раководителот на тамошниот ковид-центар
Безмалку една третина од вкупната бројка на активни случаи на ковид-19 во земјава (1 268), заклучно со денешната статистика, се во Тетово, каде што и во последните 24 е втор град во земјава според бројот на новозаразени (95), веднаш по Скопје (101). Но во Тетово моментно има повеќе активни случаи на коронавирус и од главниот град. Во општината со околу 90 илјади жители бројката на активни случаи денеска стигна до 379, наспроти 370 заборели во Скопје.
„Секојдневното зголемување на бројот на хоспитализирани и заразени со ковид-19 во Тетово е основа да се смета дека регионот веќе е во четвртиот бран на коронавирусот’,
изјави д-р Гзим Нуредини, координатор на Ковид – центарот при Клиничка болница во Тетово.
Во ковид – центарот сега веќе има 36 заболени кои се лекуваат таму, од кои 31 се на кислородна поддршка. Од хоспитализираните, двајца се на триесетина години, додека другите се над 65 години, јави МИА.
„Бројката од 59 прегледи само во прва смена вчера ни укажува дека бранот ќе продолжи. Ќе има нови болни кои ќе треба да бидат примени на болничко лекување. Сметам дека треба да има поголеми рестрикции. Не се носат маски на затворено, посебно во верските објекти. Замислете само неколку инфицирани, а без симптоми, да влезат на свадба или во верски објекти, што значи тоа за ширењето на болеста“,
изјави Нуредини.
Луѓето кои се на болничко лекување се повозрасни со хронични болести, како и со прекумерна телесна тежина.
„Се јавува брзо, за неколку дена, клиничката слика кај овие пациенти. Во 90 отсто, заразените се соочуваат со респираторни симптоми. Имаат кашлање, температура, болки во гради, мускули, покрај веќе познатата дијагностика со која се соочуваат и затоа е потребно нивно лекување во болница“,
вели Нуредини.