Стојанов има поинаков став од микробиологот д-р Никола Пановски, кој рече дека не би препорачал вакцинација на деца и дека главниот фокусот на имунизацијата треба да се возрасните и ранливите категории на граѓани
За вакцинација на деца од 12 до 16 години мора онлајн да се закаже термин на vakcinacija.mk. Рокот за пријавување на заинтересираност за вакцинација е до четврток, а од наредниот ден треба да почне закажување на термини за вакцинација на деца со „Фајзер“
Родителите да не стравуваат и да ги вакцинираат своите деца, вели епидемилогот и поранешен директор на Центарот за јавно здравје, д-р Александар Стојанов, во изјава за „Слободен печат“, коментирајќи ја вакцинацијата против ковид-19 на деца од 12 до 16 години.
„Стравот кај родителите не е ништо ново. Од како знам за себе тие одбиваат да ги вакцинираат децата и постојано имаме проблеми со тоа. Инаку, медицинско познавање во земјава нема, треба сите да се вакцинираат“, .
вели д-р Стојанов.
Стојанов не се согласува со ставот на микробиологот Пановски, кој во разговор за „360 степени“ неодамна рече дека не би препорачал вакцинација на деца и дека фокусот на процесот на имунизација треба да биде на возрасните и ранливите категории на граѓани.
„И она Пановски што вели дека децата не треба, јас велам дека треба и животните да се вакцинираат против ковид, бидејќи имаше и случаи кога човек го пренесуваше вирусот на животно, не и обратно. Се треба да се вакцинира, така се сузбива пандемија, не можете да оставате џебови“,
вели д-р Стојанов.
Toj посочува дека сите вакцини се безбедни и апелира граѓаните масовно да се вакцинираат.
„Потребно е во што пократок период да се вакцинираат што повеќе луѓе, а во тие луѓе влегуваат и децата. Еве кај нас возраста е од 12 до 16 години, но некои земји ја симнаа границата и дури и деца од 3 години можат да примаат вакцина. Така што, јас сум апсолутно за вакцинација и нема потреба од страв, вакцините се добри“,
вели д-р Стојанов.
Инаку, за вакцинација на децата мора да се закаже термин на страницата vakcinacija.mk, посочи денеска министерот за здравство, Венко Филипче. Пријавувањето трае до четврток, а од наредниот ден треба да се почне со закажување на термини за вакцинација со вакцината „Фајзер“.