За разлика од возрасните граѓани кои од денеска имаат можност да се вакцинираат против ковид-19 без закажување на термин, децата ќе мора да се регистрираат онлајн. Родителите може да закажат термин за децата преку страницата „vakcinacija.mk“ до четврток, по што ќе почне вакцинирањето на деца со вакцината „Фајзер“
За децата од 12 до 16 години да можат да се вакцинираат против ковид-19 ќе мора делектронски да се пријават на страницата vakcinacija.mk, информираше денеска министерот за здравство, Венко Филипче, на прес-конференција пред Поликлиниката во Шуто Оризари, каде денеска започна теренска вакцинација без закажен термин.
Филипче рече дека пријавувањето почнува од денеска и ќе трае до четврток, по што децата ќе добијат термини за вакцинација, а целта е рационално искористување на вакцините „Фајзер“, кои во една вијала имаат шест дози.
„За вакцинирање на децата против ковид-19 ќе треба да се закаже термин преку сајтот vakcinacija.mk, почнувајќи од денеска до четврток. После тоа ќе се поделат термините за вакцинирање на децата, бидејќи вакцината на „Фајзер“ еднаш кога ќе се отвори мора да се искористат шест лица, бидејќи има шест дози, а ако се јави едно или две деца имаме голем ризик одреден број вијали да се фрлат, а тоа не сакаме да се случи. Родителите/старателите ќе може да ги регистрираат децата и од петок ќе започне апликацијата на вакцините“,
рече Филипче.
Министерот претходно посочи дека децата ќе се вакцинираат со„Фајзер“, бидејќи, како што посочи, во моментов тоа е единствена вакцина која е дозволена да се користи за деца на оваа возраст.