Премиерот најави обнова на политичките преговори со Софија за крајот на јули, почетокот на август, откако Бугарија ќе добие нова влада
Заев ја отфрли можноста да поднесе оставка по неуспехот во Луксембург
Крај на јули, почеток на август може да се очекува да се обноват политичките контакти со владата во Софија, откако ќе се одржат парламентарните избори во Бугарија на 11 јули, најави денеска премиерот Зоран Заев на настан во Волково организиран од Општина Ѓорче Петров.
Коментирајќи го писмото од бугарското МНР, каде што се споменуваат неколку обврски што Македонија треба да ги исполни за да се отстрани ветото од Бугарија, Заев рече дека тоа е само дел од патоказот што нашата земја го доставила до Бугарија, како обврска од португалскиот предлог за решение на спорот.
„Патоказот е на 18 странци и главно се фокусира на инфраструктура, економската соработка, спорт, култура, одбрана, на сите аспекти. Тоа ние сме го дале според португалскиот предлог. Нема нешто проблематично и обврска е на двете страни за полесна имплементација на Договорот“,
рече Заев.
Одговарајќи на новинарско прашање, што може да се очекува сега после второто вето од Софија, Заев рече дека не би ги кревал надежите дека е нешто можно во октомври, кога е закажан самит за Западен Балкан и за проширувањето.
„Јас не би чекал октомври, бидејќи одлуките се носат на крајот на претседателството. Сега е во јуни, следното е во декември. Иако на 6 октомври има закажано самит за Западен Балкан и за проширувањето, но неколкупати сме изгорени, и јас и нашиот народ, и не би ги кревал надежите за 6 октомври, имајќи предвид дека ваквите одлуки Европскиот совет и Советот за општи работи ги носат кога завршува претседателството на одредена земја. Сега е Словенија од јули и се надевам дека и Словенија ќе покаже сериозен фокус на ова прашање. Јас кажав, ние продолжуваме со напори, со обиди за разговори, надевајќи се дека час поскоро ќе продолжи европеизацијата низ европските механизми, а тоа се поглавјата“,
истакна Заев.
Единствено што го отфрли како опција е негова оставка, како што беше по француската блокада во 2019 година.
„Тогаш поднесов оставка, и покрај сите предизвици добив поддршка да ја водам владата. Сега мислам дека нема потреба. Секоја година се одлучува во ЕУ и нерационално е секоја година да одиме на избори“,
рече Заев.