Министерот за надворешни работи, во интервју за Радио Слободна Европа отфрла дека ние сме прифатиле да се разговара за тоа прашање во мултилатерален контекст
Сме прифатиле да разговараме за краткото име и дека немаме никакви територијални претензии во името на државата, или, пак, да дадеме дополнителни гаранции во смисла на европски мониторинг во имплементација на договорот наспроти тоа што го имаме сега, а тоа е билатералниот мониторинг преку меѓувладината комисија, но никогаш не сме прифатиле да разговараме за јазикот бидејќи тоа е прашање што е право на секоја држава во рамки на своето самоопределување, вели министерот за надворешни работи Бујар Османи во неделното интервју на Радио Слободна Европа.
Тој потврдува дека предлогот на португалското претседателство може да разреши одредени чувствителности што ги има бугарската страна и да ја задржи својата позиција, но отфрла дека ние сме прифатиле да се разговара за тоа прашање во мултилатерален контекст.
„Во преговарачката рамка има една реченица со техничко значење во која што стои дека акито ќе се преведе на македонски јазик. Бугарија смета дека треба да се користи формулацијата од Договорот од 2017 година која што беше една реципрочна билатерална формулација за јазикот во кој што бугарскиот јазик беше напишан како бугарски јазик според Уставот, а македонскиот беше напишан како македонски јазик според Уставот или вториот пристап да се дефинира историскиот контекст на создавање на јазикот во некој билатерален договор. Така што да, спорен од нивната страна е тој момент за кое што португалското претседателство има решение за кое ние сметаме дека е добра основа“,
вели Османи.
За тврдењата од Софија дека не го спорат македонскиот јазик и идентитет, Османи објаснува дека се работи за оспорување на историскиот корен на јазикот и тоа го претставуваат како неспорење на идентитетските атрибути кој што сега ги има државата.
„Меѓутоа со барањето да се дефинира согласно јазичната клаузула од Договорот од 2017 година очигледно е дека се редефинира и сегашното дефинирање на јазикот“,
додава тој.
Османи уверува дека пристапот на македонската страна нема биде избрзан и ќе се имаат предвид очекувањата на граѓаните.
„Ако има еден позитивен ефект од оваа блокада е дека граѓаните се сплотија во солидаризирање во случајот кон македонскиот народ, бидејќи, на некој начин под директен атак се неговите национални атрибути“,
вели министерот за надворешни работи Бујар Османи во неделното интервју на Радио Слободна Европа.