Во однос на локалните избори, премиерот посочи дека ВМРО-ДПМНЕ бара избор на градоначалници во прв круг, со цензус од 30 отсто од вкупниот број гласачи, а СДСМ предлага да има отворени листи за советници
Парламентарните политички партии се усогласиле околу измените на Изборниот законик согласно препораките на ОБСЕ/ОДИХР и тоа прашање е завршено, но сега продолжуваат дебатите околу промената на изборниот модел во врска со парламентарните и локалните избори.
Премиерот Зоран Заев вели дека за овие прашања не се преговара во Владата, туку на партиско ниво. Тој изрази подготвеност да прифатат сè што значи унапредување на изборниот систем, меѓутоа како таков не го гледа предлогот на ВМРО-ДПМНЕ за враќање на мнозински изборен модел за парламентарните избори. Иако Владата даде негативно мислење за последниот предлог за измени на Изборниот законик, поднесен од помалите парламентарни партии, Заев вели дека добра реформа е воведување една изборна единица.
„Ние поддржуваме една изборна единица, како најголема политичка партија во државата, а како основна база и потреба од помалите партии. Како мултиетничко општество сме убедени дека треба да дадеме шанса на една изборна единица, која ќе значи поголема разноликост во парламентот, ќе ја скроти или ќе ја ограничи моќта на шефовите на поголемите политички партии и ќе ја унапреди демократијата во државата, а ќе гарантира поголема застапеност и на помалобројните етнички заедници, но и на помалите партии. Опозицијата, генерално, според последното што го слушнав, бара мнозински модел. Тоа е уназадување според нас. Но, нека разговараат тимовите, па ќе ги слушнеме сите аргументи“,
изјави Заев.
Кога станува збор за коалициските партнери – ДУИ, според информациите што ги сподели премиерот, барањето е да има осум изборни единици.
„ДУИ предлагаше три изборни единици, па после слушав осум изборни единици. Ние на Влада не ги разговараме ваквите прашања, туку на партиско ниво каде што се преговара. Се надевам дека сите, пред сè и над сè, ќе имаме обврска да прифатиме чекорење кон унапредување на демократските модели на гласање. Изборите се врв на демократијата. Ние сме отворени и за прифаќање на сè што е добро и што значи унапредување. Подготвени сме да се откажеме од дел од тоа што во сегашните модели ни следува како гласови и пратенички места, за сметка на демократија, зашто со една изборна единица поголемите четири партии веројатно ќе изгубат дел, но ќе добијат граѓаните, ќе добие демократијата преку застапеност на помалите партии“,
рече Заев.
За локалните избори, тој не кажа што е прифатливо а што не за СДСМ, туку само ги сподели позициите на неговата и на најголемата опозициска партија.
ВМРО-ДПМНЕ, рече Заев, бара избор на градоначалници во прв круг, со цензус од 30 отсто од вкупниот број гласачи, а СДСМ предлага да има отворени листи за советници, зашто смета оти советниците им должат многу повеќе на граѓаните отколку на партиите што ги предлагаат.
„Се надеваме дека ќе се постигне консензус или барем поприличен консензус“,
рече Заев.