За поранешниот министер во владата на ВМРО-ДПМНЕ, Спиро Ристовски, е чудно и несфатливо како го поврзале со случајот „27 април“, каде што е еден од обвинетите за организацијата на настаните. Освен со ексминистерот Миле Јанакиески, кој исто така е обвинет, а за кој рече дека имал приватна комуникација, со другите обвинети посочи дека имал исклучителен службен контакт.
Ристовски денеска дава исказ во судскиот процес кој влезе во завршница и во својата одбрана рече дека исказот на Александар Василевски-Нинџа, што се однесува до него, е невистинит.
„Станува збор за невистинит исказ од лицето Александар Василевски-Нинџа. На денот на настанот не сум комуницирал ниту, пак, сум го сретнал во просторите на ВМРО-ДПМНЕ, како што тој тврди. Во тој период немав никаква партиска функција, не сум имал никаков контакт со структурите на партијата“,
рече Ристовски.
Нинџа со правосилна пресуда е осуден на 7 години затвор во првиот судски процес за крвавиот четврток. И во тој судски процес, но и во случајот со организаторите сведочеше дека од 8. кат во централниот штаб на ВМРО-ДПМНЕ се координирале дејствијата од критичниот ден. Во неговиот исказ тој ги споменуваше и Ристовски и Јанакиески како едни од лицата кои ги видел во просториите на партиското седиште од каде што ја воделе координацијата.
Ристовски денеска, покрај тоа што негираше дека го видел Нинџа во штабот, зборуваше дека откако се случил упадот во Собранието во партиското седиште имало многу луѓе и било хаотично.
„Околу 17 часот отидов во партијата во Центарот за комуникации, го чекав Земри Ќамили за да одиме во посета на поранешниот министер за образование Абдилаќим Адеми. Во тој период почнаа настаните во Собранието. За цел тој период бев во партијата, ситуацијата беше хаотична. Имаше огромен број луѓе, градоначалници, пратеници. После полноќ штабот на Центарот за комуникации беше преполн“,
рече Ристовски.
Ексминистерот, исто така, се осврна и на протестите „За заедничка Македонија“ на кои, рече, не присуствувал.
„Поединци од партијата ВМРО-ДПМНЕ, колку што знам, ги поддржуваа протестите, а партијата како субјект мислам не ги поддржуваше. Од организаторите на протестите го знам само Богдан Илиевски, и него ретко сум го среќавал“,
изјави Ристовски.
Покрај Ристовски, денеска одбрана треба да даде и ексминистерот Миле Јанакиески.
Тоа на минатите рочишта веќе го направи обвинетиот поранешен претседател на Собранието, Трајко Вељаноски. Уште еден поранешен функционер кој со нив седи на обвинителна клупа е тогашниот директор на УБК, Владимир Атанасовски.
Сите се гонат за терористичко загрозување на уставниот поредок и безбедноста.
Судскиот процес за организацијата на „27 април“ е во завршница. Откако обвинетите ќе завршат со исказите, евентуално би можеле да се изведат дополнителни докази и до изрекување на пресудата ќе преостанат само завршните зборови на обвинителството и на одбраната.